呢輪大家日日夜夜都掛住睇世界盃，冇人對其他體育活動感興趣，連奧運馬術比賽有限公司行政總裁林煥光（WK）都要避吓鋒頭，星期一搬咗竇去中銀37樓都未敢擺入伙酒。
WK一直覺得公司喺中環好辦事，但係就畀唔起地王嘅市值租金，言下之意，即係有人鼎力支持啦。咁奧運會屬國家大事，一定有人出手幫忙，至於收佢哋幾錢呎，佢就話唔方便講喎。
馬術比賽公司𠵱家只得幾個職員，WK仲要請人，佢話，打完世界盃就會請一眾行家，特別係專跑奧運線嘅體記到新辦公室坐坐，介紹吓工作情況，因為「未來兩年要同啲體記拍住膊頭做嘢。」
WK返咗新工後，成日北京香港兩頭飛，皆因要同北京奧組委保持緊密聯絡，而早前佢就去咗歐洲睇馬術比賽，順便學吓嘢。
傳真︰2623-9278
電郵︰[email protected]