資深股票客戶謝太：Karen，謝太呀。雖然你上個禮拜同我講，話𠵱家最好揸現金，最好唔好入市。不過，我真係好想入市博反彈，想聽吓你嘅意見。
經紀Karen：謝太，咁多個客中你係最醒目嘅一個，你一定仲記得我點解叫你唔好入市？
謝太：記得！你話世界外圍股市指數，已經全部跌穿200日平均線嘅技術阻力，岌岌可危。就係因為你咁講，我好留意外圍股市指數。你講過就根據當年CharlesDow講過嘅DowTheory，各大股市指數相繼跌穿技術阻力位，係確認轉大勢嘅作用。如果你咁信DowTheory，咁就一定相信DowJonesIndustrialAverage嘅杜指啦！杜指由星期二跌穿200日平均線，去到星期五收市升番上200日平均線之上，恒生指數都一樣，上周尾升番上200日平均線上收市，咁根據DowTheory，咪即係話由03年開始嘅世界升市大趨勢未變啦！
杜指可人為操控
Karen：謝太果然醒目，同你講一次DowTheory就已經領略到。不過今次我唔同意你個講法，因為今次杜指真係誤導咗好多人。首先，杜指其實只係喺美國散戶同公眾人士心目中有舉足輕重嘅作用，真係專業嘅市場參與者就少理杜指啦，佢哋會留意標普500指數多啲。原因杜指係非常古老嘅指數，計法亦非常古老，令到指數成份股嘅比重，係靠股價嚟計，而唔係市值。會令到出現做飛機嘅波音，雖然市值只有600億美元，比起做電腦CPU嘅英特爾1000億美元市值少四成，不過因為波音嘅股價係85美元一股，而英特爾就得18美元一股，所以波音佔有比重反而高過英特爾四倍半。
謝太：嘩！唔係真係咁古老呀？咁杜指真係冇乜代表性。
Karen：最危險就係，因為杜指嘅計法又唔跟住市值計算，所以如果有人要操控杜指，只要向細市值，不過大股價嘅股票埋手就可以。
謝太：操控杜指？有乜着數？
Karen：杜指喺美國散戶同公眾人士仲有舉足輕重嘅作用，所以如果我係政府要製造一個欣欣向榮嘅假象，就好容易托市。
恒指未穿時辰未到
其實睇番上個禮拜，升得最多就係股價最大嘅波音，佢一間公司市值只係升咗68億美元，就比起最細股價嘅8間公司加埋市值升250億美元對杜指嘅影響大。謝太，唔好再睇杜指，俾人操控。世界股市主要指數，全部跌穿200日平均線，恒指未跌穿都只不過係時辰未到，謝太，睇定啲先至再玩。