上周五，港股一開就升372點，埋單升407點。隔晚有貨者富貴，隔晚有淡倉嘅一朝閉翳，贏輸靠運氣多過靠眼光。就算識得解讀伯南克密碼，亦無法預計全球股市反應如此劇烈。
港股喺最低位反彈639點，短期要再升，須有大成交配合。如果真係再升多三兩百點，則恐怕有挾淡倉成份。做好友，𠵱家買C輪要先諗吓啲回吐風險，要買都應該等大市回吐至諗。如果手痕，喺大市處高位時揸P輪，較為化算。個市肯定非常波動，做嘢隨時執生。
中移動P輪3676：中移動（941）全周進賬0.90元，收42元，吼住上到挨近44元，買P輪博正股調整，對象係3676，11月中夠鐘，輪價43仙，溢價6.5%，槓桿率9.8倍（有效5.1倍），引伸波幅32.8%。
國壽P輪9050：國壽（2628）全周跌0.20元，收11.20元，吼住上到12.60元，買P輪9050，12月初到期，輪價1.36元，溢價9.6%，槓桿率8.2倍（有效3.7倍），引伸波幅42.8%。
中銀P輪9137：中銀（2388）全周升0.20元，收14.95元。吼住上到15.20/15.30元，買P輪9137，11月中到期，輪價99仙，溢價7.8%，槓桿率15.1倍（有效6.8倍），引伸波幅25.4%。
章盛