侍仔：早晨呀肥牛，近排好少見你落嚟飲嘢喎。
肥牛：𠵱家我要返夜晚，咁啱今日放假就落嚟探吓你囉。今晚有你最愛嘅西班牙，會唔會再大炒對手呀？
侍仔：唔炒住啦，𠵱家最緊要夠分出線，再加上今屆比賽無咩冷門，揀正路西班牙贏2:0！我覺得烏克蘭嗰場有些少冷味，烏軍嘅軍刀舒夫真高狀態唔知點，又有中堅華舒卓克停賽，沙地可以偷雞。
肥牛：但係沙地後防好鬆散，對突尼西亞失嗰2球都係後防睇唔緊，對住有組織力嘅烏克蘭，我唔信沙地可保不失；而且軍刀唔係一切，禾路連同禾路比都係具實力嘅代替品。
招積域：但唔驚球員信心受影響咩？上場輸咗4球喎。
肥牛：上屆沙地開波咪又俾德國炒8蛋，但第2場對喀麥隆佢哋已經踢番自己風格，而且表現唔錯，相信烏克蘭都可以做到呢樣，知恥近乎勇嘛！烏克蘭可以贏2:0。
侍仔：咁我跟你買啦。瑞士對多哥又點樣？多哥後衞阿巴路停賽，瑞士可以開「客勝」啩？
招積域：贏波係關前鋒嘅事，你見瑞士嗰個費爾上場對法國離門3碼都「飛機」，就知佢攻力有幾勁啦。瑞士係會贏到，但會好似英格蘭第1場咁，攻得辛苦之餘又贏得符碌，揀「讓球主客和」「和局」就啱晒啦。
侍仔：瑞士有個前鋒叫盧斯連利尼唔錯嘅喎，早一季佢喺瑞士超嘅杜安射入30球，上季中轉會布拉格斯巴達，嗰邊嘅人評佢係「有跑不完氣力嘅機會主義者」。
肥牛：嘥氣啦，世上有幾多個雷哥斯達，冇氣但又好波吖？冇氣根本打唔到比賽；而且布拉格斯巴達唔成氣候啦，呢位前鋒亦欠代表性。你都係買瑞士單W過落西班牙單W算數啦。
文：高洛文