我IT妹咁鍾意打機睇碟，一直想搵部薄屏電視擺喺房煲機煲碟；阿哥話細細部可以買LCDTV，但老死Peter仔就話細寸數冇高清，打XB360唔夠勁喎！唉，本來都心大心細，好彩同事AV通話SHARP啱啱出咗隻20"LCDTV，機仔細細居然食到HD嘅1080i，當堂醒神晒！
記者：許福合
攝影：陳陶鈞
ImageGirl：Rudy
色彩豐富又夠滑
LCDTV尺寸上一向都比Plasma選擇多，今次介紹嘅SHARPAQUOS系列LC-20B10HLCDTV，Plasma陣營更係無得揀，加上AQUOS系列一向都係LCDTV質素信心保證，受注目程度更係高人一等。
LC-20B10H最特別之處，係細機都可以支援720p同1080i嘅HD影像訊號，尺寸為20吋，等到最快年尾推出嘅數碼電視廣播，就可以立即欣賞到高清電視質素，若然好似筆者咁等唔切，仲可以駁部支援HD嘅XB360，亦一樣可以享受到1080i高清遊戲畫面，實際試「玩」時，試玩遊戲《RidgeRacer6》畫面以彩色為主，可以見到畫面較為圓滑，與普通電視相比，鋸齒邊位明顯減少，配合畫面快速移動時，都無出現一般LCDTV鬼影嘅情況。相信除咗因為用上HD畫質外，AQUOS系列所使用BlackTFT顯示屏亦有所幫助，整體畫面滑淨清晰。
自動調校光暗
除咗畫面夠正之外，LC-20B10H仲有好多User-Friendly嘅設計，最常用嘅係內置OPC功能，喺機身面板上多咗一組光源感應器，可因應外在環境而調節光度，咪以為呢個功能無乜用，由於LCDTV一般光度都好充足，當用家熄咗房燈睇戲打機時，使用正常光度屏幕就會變得刺眼，相信唔少人都對此有經驗，OPC會即時調暗屏幕光度，長時間對住屏幕都會舒服啲。
另外，LCDTV本身已經內置電視接收及立體聲揚聲器，而輸入介面可用AV、S-Video同色差，基本規格為500:1對比度，430cd/m2亮光度，以同尺寸來講都可算唔錯，加上廠方數字顯示，Panel可有長達60,000小時壽命，都叫信心保證，加埋實際睇過，喺畫質同可視角度方面都不俗，適合地方淺窄嘅環境，尤其是睡房私人高清影院！
畫質測試
《RidgeRacer6》更強速度感
用上高清畫面顯示，鋸齒位明顯減少，畫面去得更為順暢，令到賽車時尤其直道更有速度感。
《RumbleRoses》靚女膚色自然
遊戲中會出現唔同膚色靚女角色大打出手，顏色比非HD畫面更為自然，尤其間中大特寫，一絲絲頭髮都可以睇到。
夠清夠立體
雖然未有高清電視作測試，不過相比普通電視機，立體感強烈、雜訊少、畫面亦清晰，睇《法證先鋒》亦可幫手搜集證據。
有層次夠立體
播放DVD時，畫面亦有好高水準，呢幕顯示雪山雪景，連雪山唔同層次紋理都睇多咗，整個山變得好有立體感。
記者意見
Profile
顯示屏：20"
解析度：640×480
橫直比：16:9
對比度：500:1
亮光度：430cd/m2
視像輸入：色差、S-Video、視頻
查詢：SHARP（28229435）
小知識：1080i/p係乜東東？
1080i呢個名稱，大家見之久矣！好多人都會馬上聯想到1,920×1080這個解像度；不過最近又多咗樣1080p走出嚟！其實簡單講，「i」代表了「隔行掃描」，而「p」則代表了線數更緊密的「逐行掃描」！雖然現在大部份的影音播放媒體，諸如大家最熟悉的HDDVD，都只是行1080i；不過大家可能忽略了以WindowsMCE為構建平台的硬碟錄影機，其實已對應1080p的高畫質播放（不過片源較難搵，好多時都要上網摷！），所以估計LCDTV嚟緊嘅大趨勢，會更上一層樓對應1080p。