葡萄牙淨勝伊朗兩粒，但表現普通，而且唔係好明點解奠定勝局個12碼會畀基斯坦奴朗拿度（簡稱C朗）處理，出事邊個孭呢？
葡萄牙歷年來球星不斷，但其實喺世界盃嘅歷史認真麻麻，今次係自66年後第1次晉級次圈，認真抵打屁股！
講番嗰場波，迪高個遠射固然令人既驚且喜，但C朗臨尾鎖定勝局嗰個12碼，就搞到好多人𢱑頭；球隊有費高、迪高、保列達等劊子手，但教練史高拉利就偏偏畀未來希望C朗射，好彩射入啫。
但係我判官諗深一層，「大菲」特登畀C朗主射可能有苦衷，皆因C朗𠵱家成為球隊唯一希望，加上近排佢好似腳風唔多順，射極都唔入，而且上仗仲頂中楣㖭，「大菲」都係想C朗有「士哥」後信心番晒嚟；不過最緊要係啲大佬都肯讓畀佢射，證明球隊現時氣氛融洽，只要C朗打番順啲，球隊今屆絕對有希望創造佳績；而且佢咁鬼靚仔，佢打好啲，葡萄牙都多啲球迷支持！幾好呀！
判官話
成隊波都有進步空間，如果個12碼可以令C朗腳風順番，相信葡萄牙都會唔同晒，話到尾都係球迷之福啫！
抵撐指數：★★★★
註：以5★為最高
專家話：葡萄牙中路欠攻勢
「葡萄牙在首兩場分組賽表現平穩，防守相當緊密，但進攻太集中兩路側擊，中路進攻只限於遠射；如16強遇阿根廷肯定是下風，因阿根廷會針對此點作出防守，如對荷蘭則是『五五波』。」
曾偉忠(足總技術及發展總監)
網民反應：「靚仔嘛，抵入波啦！」
外界又對C朗有何評價呢？「佢靚仔嘛，抵入波啦！」「費高想益吓後生仔啫，應該係費高射嘅。」「C朗會打低世盃所有後衞！」「怕佢獨扭累死葡萄牙。」
世盃判官歡迎球迷來稿
世盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦！來稿勿過300字。
世盃判官體育版電郵：[email protected]
體育版傳真熱線：23703534