世界盃開鑼個多星期，精采賽事唔算太多，波亦相當難賭，熱門球隊賠率乏味得來又唔穩陣，好似墨西哥打和安哥拉、加納贏捷克、意大利打和美國就令唔少投注人輸錢。趙飛雲覺得任何賭博和投機活動一定要講值博率，睇波同賭波最好不要混而為一，因為熱門的球賽，好多時好睇唔好賭，趙飛雲雖然鍾意睇巴西及英格蘭，但就未投注過1毫子，1賠1.1或1.2，賭嚟做乜？
言歸正傳講股票，美國聯儲局班官員繼續口不停，而息口繼續唔知幾時見頂。美股上周五無力作第3日上升，杜指微跌0.64點，收11014。盤中高位11045，正是20日線所在，暫缺乏動力突破，不排除再回頭試底，早前低位10699是短期關鍵位，不宜失守。
港股在美國上市的預託證券，上周五輕微回吐。滙控（005）收135.22元，較香港跌0.38元，其餘重磅股中移動（941）、和黃（013）及中海油（883）等變化不大，未提供太大啓示。但中央再出招抽緊銀根，以及暗示宏調措施陸續有來，則可能對急彈兩日的中資股再帶來壓力。
半年結或有櫥窗粉飾
不過，港股上周四開始反彈，周五以372點大裂口高開，低位買到貨的散戶不多，上周撈底的貨源估計集中於大戶手中，而半年結在即，估計佢哋點都會撐一撐，因此不排除港股今日出現先低後高的走勢。當然，如果日股又出現大插水的跌勢則另計。
短中期而言，大市最受息口去向影響，由近期伯南克對通脹及美息不斷出爾反爾的言論來看，可能佢自己亦睇唔通，所以趙飛雲繼續睇波，唔心急入市，策略上仍是寧淡勿好，揀定一兩隻P輪隨時出擊。
趙飛雲