要選搞起REITs風潮嘅人，大家應該馬上諗起蘇慶和同「壞孩子」（TCI）。話說領匯上市，成為第一隻房託基金，全城爭購，掛牌之後孩子基金大手買入，曾炒高近一倍，於是間間大地產公司都話分拆REITs，簡直成為潮流。
咁如果選殺死REITs嘅人，又會諗起邊個呢？冇錯，就係羅氏兄弟嘞。
鷹君大老闆羅嘉瑞，因為發展朗豪坊，財政壓力好大，咁一有REITs概念，佢馬上將間花旗銀行廣場攞出嚟上市。雖然當時潮流已經有多少逆轉，不過在美林努力推銷下成功去晒貨，至於掛牌當日跌逾一成半係後話，過咗海就神仙。慘情嘅係新地、恒基等準備拆REITs者，個個好似東涌啲纜車咁半天吊。
細佬冇大佬咁好彩
阿哥成為香港REITs殺手之後，細佬羅康瑞又將佢大陸嘅地產項目安排上市；嚴格講，佢隻瑞安房地產就係一隻內地REITs，不過今次冇阿哥咁好彩，招股期間碰正大跌市，佢定價亦要得好盡，截飛嗰日卒之要抽起。呢單嘢，相信對內地嘅REITs都有好大殺傷力。
股市久不久就炒一個概念，REITs都唔例外，咁快玩完就令人有少少詫異。大抵做得地產商都精明極點，好少益人，見到佢哋一窩蜂咁出擊，小股民該知所進退了。
李華華
讀者如有任何意見或報料，歡迎發送電郵至[email protected]。