今個月初布殊搵咗高盛主席保爾森做美國新財長，高盛隨即委任布蘭克費恩（LloydBlankfein）做繼任人，只待國會通過財長任命，布叔叔就坐正。雖然未做主席，但布叔叔已經好勤力搵生意，前日去咗上海，拜會上海市市長韓正。呢次上海之行係佢首次主持全球董事會亞洲區嘅第一站。
韓正同布叔叔講，中國政府已經確定，未來中國金融改革過程中，改革試點將在上海，主要在浦東陸家嘴金融中心進行，因此高盛應加強同中國金融監管部門溝通，以及關注中國國企及國有資產重組問題。布叔叔話，現在高盛集團嘅利益同中國金融行業嘅發展已經綑綁埋一齊，高盛要想從中國賺錢，就必須促進中國經濟增長。高盛近年積極參與大型H股上市，本月初上市嘅中國銀行就係其中之一，今次布叔叔去上海，反映高盛都幾緊張中國商機。