上個禮拜六晚去咗蘭桂坊蒲，飲吓酒，睇吓靚仔，同埋睇吓世界盃。大家講開先發覺傳統紅酒樽都係綠色，但就唔知點解。我個friend酒評家劉致新解釋，因為綠色抵禦多啲紫外光，尤其係墨綠色；而紫外光會破壞紅酒嘅味道，「曬得多，啲酒會無味。」
作為「妙齡少女」，我唔畀自己醉，唔會飲香檳或者甜酒，因為飲烈酒，自己會就住唔飲咁多，好味易入口嘅反而會愈飲愈多；仲有唔好溝酒飲，好易醉㗎。
葵涌醫院精神科醫生張建良講過，溝酒飲易醉，未有正式醫學根據；但有研究話汽酒例如啤酒，啲氣會令到個胃郁快啲，加快吸收酒精；溝埋啲烈酒，個胃迅速吸收大量酒精，會快啲醉。
有另一種解釋，就係淨飲烈酒，個胃好快吸收好多酒精，好易wingwing哋，唔敢飲太多；但溝埋其他酒精少啲嘅酒，個胃會因為成肚水而慢咗吸收酒精，令你以為自己仲飲得，結果愈飲愈多，成個胃都係酒精，嚟料時醉得仲勁。
咁食定牛油打底，係咪無咁易醉吖？張醫生話，飽肚只係令個胃吸收酒精嘅速度減慢，但一樣會醉，只係遲少少，「有啲人飲完以為自己冇醉仲揸車，揸揸吓先醉，咪出事囉。」佢又話，唔好以為飲咗薑茶可以解酒，其實只係啲薑嘅辣味令你精神少少，隔一陣又wing過。
正所謂酒肉穿腸過，飲少少好喇。
逢周一刊出