最近睇報紙刊出全球最具競爭力城市，香港排第十九，前二十名之中，竟有一個城市，就係聖弗朗西斯科，左丁山唔識噃，自覺老貓燒鬚。左丁山中學讀地理，成績好差，在肥佬邊緣，但若係「政治地理」，每一個大洲嘅國家與首都都識背，全世界大城市名字瞭然於胸。呢次居然唔識「聖弗朗西斯科」，豈有此理。直至老婆用普通話讀，唉，發音即係SanFrancisco啦，乜啲報紙盲目照跟內地，唔記得咗大名鼎鼎嘅三藩市呀！
三藩市係一個可愛城市，市內交通十分方便，有山有水，南下有矽谷，北上有納帕山谷（NapaValley，納帕係依照壹傳媒獨立非執行董事葉維義匹馬Napa嘅譯法），好好玩啫。飛機黃就快調去三藩市做國泰北美主管，要搵地方住，照計住喺市內就夠晒正啦，NobHill區冇得彈。
一講起NobHill，家居於此嘅律師L與老闆嚟到香港，仲有一位同事，聽發音就知道佢係歐洲人。本來約咗去灣仔海都，但因為塞車怕怕，臨時改咗去「國金軒」，因為佢哋住在四季酒店也。與佢哋在「國金軒」食晚飯之時，適逢西班牙對烏克蘭，左丁山講：「美國人唔識世界盃，美國隊今屆可能係三零部隊，不談也罷，歐洲仁兄你以為今晚邊隊贏呢？」歐洲人話：「我希望西班牙打扁烏克蘭，捧西班牙大勝。」咦，係西班牙擁躉喎，問佢原籍邊度，佢話：「我係俄羅斯人，去美國讀書，入咗籍。」俄烏曾是兄弟，同屬蘇聯，現在就冇晒情講，何況俄羅斯入唔到世界盃，烏克蘭掂咗，俄羅斯人更條氣唔順，聽完佢講，以為國家情緒作怪啫，諗咗一諗，西班牙從來大賽腳軟，烏克蘭有舒夫真高保至尊，一於搭注西烏賽和。唉吔，餐飯都未食完，已收到SMS，西班牙領先二比○。後來更贏到四比○，果然應咗俄羅斯人（基金嘅股票分析師）嘅口卦㖭。
食咗一晚飯，問佢哋乜嘢美國股票有前途，佢哋三人係高科技基金（high-techfund）管理人，向左丁山推薦Corning，中移動！