OL們早上起床7件事──衫、裙、鞋、袋、眼影、胭脂、唇膏已充塞晒每朝嘅時間，仲要煮埋便當？實趕唔切啦！日菜大師小松本Coco有計，度身設計高纖低脂嘅便當，仲唔使隔晚醃料，加上日式調味料已經好入味，一早翻叮攞返公司已經靚到羨煞同事，聽日晏晝唔使諗去邊度食飯啦！
記者︰劉昱蘭
攝影︰陳陶鈞
示範︰小松本Coco
鳴謝︰吉之島超級市場
亞視主持講食經
Coco喺亞洲電視主持《至瀛新口味》烹飪節目，愛日菜皆因老公係日本人。Coco曾去過外國，明白外國人眼中，東方食物偏向濃味，好多外國人都唔係好慣，令佢明白大家要共融就要互相接受。「尤其香港係一個多元化城市，同好多唔同國籍嘅人一齊做嘢、食飯，就唔好嫌人哋啲味道聞落怪怪哋咁，大家要識遷就吓。」Coco嘅親身體驗，將心比心大家都啱用。今次整嘅便當啱晒香港人口味，連日本老公都大讚Ichiban！
雞柳芒果紅米飯 醃肉時間都慳番
價錢︰$25
需時︰15分鐘
好多人都唔鍾意雞胸肉，嫌佢嚡口，其實佢夠低脂健康，包住芒果酸酸甜甜好開胃，同紅米一樣係高纖之選。初時好懷疑唔醃肉唔入味，原來臨埋鑊先加調味，慳番好多時間。
材料
紅米及白米共1碗、雞柳3片、芒果半個、蘆笋1/4束、燒烤蘑菇1隻、橄欖油1湯匙、油小量、味醂、豉油、酒各1湯匙、水2湯匙
簡易法
1.蒸飯，雞柳橫切割開攤平，芒果去皮切條，將芒果肉放在雞柳上捲成條狀；
2.洗淨蘆笋及蘑菇後放在錫紙上，灑上橄欖油拌勻後包好；
3.落油將鑊燒熱，雞柳卷及錫紙包落鑊，以中火煮2分鐘；
4.調勻味醂、豉油、酒及水後倒入鑊，加蓋後待熟，雞柳卷切段，取出各物放入飯盒即成。
貼士︰
雞柳條落鑊時記緊把摺口向下放，熱力會令肉收縮，肉條自然捲實，連落粉封口嘅時間都慳番。錫紙上加幾滴水會減少烹煮時間。
海虎蝦飯素白飯 滴油不沾
價錢︰$30
需時︰20分鐘
唔用油一鑊過用水烚材料實唔怕肥。「飯素」係啲乜？日本人嘅飯餸無乜汁，傳統上好鍾意用飯素撈飯，Coco嘅日籍丈夫就係典範，淨係飯素溝白飯都可以食到兩大碗。
材料
白米1碗、海虎蝦3隻、娃娃菜2棵、四季豆1/3包、水2杯、鹽小量、即食白芝麻、味醂、味噌、黑椒牛扒汁各1湯匙、飯素適量
簡易法
1.蒸飯，海虎蝦去殼除腸，切開娃娃菜，四季豆切段（約3厘米長）；
2.加水及鹽落鑊燒沸後，順序將娃娃菜、蝦及四季豆落鑊，見蝦爆開即代表熟透；
3.四季豆拌入白芝麻、味醂及味噌，蝦以黑椒牛扒汁調味，娃娃菜索乾水，白飯拌飯素即成。
貼士︰
可以將海虎蝦嘅蝦尾尖形的部份剪走，食時就唔會拮到嘴。
番薯波波甜品 高纖帶甜
價錢︰$25
需時︰20分鐘
番薯咁飽肚當然高纖，而且帶甜味，食時唔使落咁多糖又無咁易肥喇。圓圓小巧又唔濕，帶返工最GoodFit！
材料
番薯4個、熱水30毫升（加入糖20克）、上新粉50克、黑芝麻碎2湯匙、糖1湯匙
簡易法
1.番薯去皮切粒，用清水浸5-10分鐘後索乾水，放入鍋中烚熟成番薯茸；
2.上新粉加熱水搓成粉糰，分成小份，放入鍋中烚約5分鐘後，取出放在濕布上，與番薯茸搓勻；
3.將粉糰平均分成8份，搓成丸狀，撒上黑芝麻碎及糖即成。
三色大牛肉紫菜飯 粗身粉絲最掂
價錢︰$12
需時︰20分鐘
雜椒近乎零卡路里，KeepFit必食。不妨試吓呢隻特韌粉絲，以葛切製成嘅粗身粉絲夠高纖，食落彈牙又煙韌，係小記強力推介。
材料
白米1碗、水2杯、特韌粉絲3包、三色椒各1/4個、牛肉火鍋片100克、黃芥末適量、大葱1條、洋葱沙律汁11/2湯匙、韓式燒肉汁2湯匙、紫菜1片。
簡易法
1.蒸飯，用1鑊沸水放入粉絲蒸約7分鐘；
2.三色椒切絲，牛肉片鋪平塗上芥末、大葱切段（約5厘米）後放在牛肉上捲成條狀；
3.將牛肉卷放在鑊中的粉絲上，把椒絲鋪在牛肉卷上，蓋好後以中至小火煮約2分鐘；
4.熟透後，先把椒絲以洋葱沙律汁調味；牛肉卷取出切段留下粉絲在鑊中，以韓式燒肉汁調味，再以大火煮至收汁，白飯加上紫菜裝飾即成。
貼士︰
牛肉條有芥末黏住，但Coco話好多時見啲肉條都有一夾即散嘅通病，食時要留意咯！
