擁有一雙電眼的型佬方中信，昨日在上海出席電視節宣傳時，成為內地性感女星姜華的獵物，穿上低胸裙的姜華甫見方中信，即攝位坐在其身旁放電，托腮谷胸送秋波，但在眾目睽睽下，方中信頓變絕緣體，不敢理睬她。上海直擊
第十二屆上海電視節昨日開幕，由於電視節以買賣劇集為主，所以不少電視台設置攤位介紹新劇吸引買家，無綫今年也有設置攤位，更派出上周在港播映大結局的重頭劇《火舞黃沙》演員黎姿、林保怡與黃德斌到場造勢。至於在無綫攤位毗鄰的中央電視台攤位，則派出新劇《愛情新呼吸》主角林峯、方中信與內地女演員姜華到場宣傳。
攝位拋媚眼
穿上低胸裙的姜華似乎對方中信情有獨鍾，不但主動坐在他旁邊攀談，還不時俯身托腮，酥胸半露，施盡渾身解數展現媚態。雖然女方如此主動，但在大批傳媒監視下，同樣擁有一雙電眼的方中信卻一眼也不敢望她，也沒有理睬對方，反而跟林峯雞啄唔斷。
林峯首次為中央台拍劇，可以有機會了解內地的製作，感覺相當不錯，他說：「我希望下次再拍內地劇，可以同陳道明合作，我好欣賞佢。」問林峯會否到無綫攤位探班？他說：「唔會啦！因為今次係中央台請我嚟，過去唔係幾好意思。」
與影帝無緣
而黎姿和林保怡在無綫攤位宣傳《火》劇，遠比林峯這邊較受歡迎，圍觀人數眾多，黎姿說：「我都係第一次嚟上海參加電視節，其實出席呢類電視節幾好，可以增加知名度。原本內地電視台搵我同陳道明合作拍一齣劇，酬勞好可觀，但係因為撞咗無綫嘅期，所以拍唔到，不過我又唔會覺得好可惜，因為自己有今日都係無綫畀嘅，做人應該飲水思源。」
採訪、攝影：丁寧
