昨日父親節，教統局局長阿瑟王兩位公子分別喺美國同英國做緊醫生，搞到佢上商台節目《政好星期天》時，都忍唔住講話好掛住兩個仔，𠵱家佢哋三父子都只可以透過電腦視像會議咁見面、傾吓偈，佢仲提起當年嘅湊仔經！
阿瑟王話個仔細個時，會根據佢嘅年紀畀零用錢，好似大仔八歲嗰年，佢每星期畀八蚊佢買嘢食。點知，阿瑟王有一日發現個仔櫃桶有好多張十蚊紙，於是問個仔點解有咁多錢，結果發現個仔好有生意頭腦，將媽咪每日畀佢嘅三文治賣畀同學，所以賺到好多錢，仲有錢買朱古力食。
阿瑟王聽完之後當然鬆晒，仲讚個仔似佢咁趣怪，但係佢太太就好鬼嬲，因為個仔日日都唔食佢嘅三文治。
堅持過時過節叩頭
講開個仔，阿瑟王就停唔到，82年佢由英國返香港做中大醫學院院長時，兩個仔都好慣香港嘅生活，又鍾意食唐餐、用筷子。阿瑟王仲話，佢教個仔食飯，一定要夾畀人哋食先，啲飯一定要食晒，如果唔係將來就娶個豆皮老婆，灌輸晒啲中國民間傳說畀佢哋聽。
講傳統，阿瑟王過時過節都仲堅持同長輩叩頭，就連西人太太Diana都要入鄉隨俗跟佢一齊叩頭。至於佢兩位公子，新年、過節就要同佢叩頭，仲話係好自然嘅事！佢同大佬寶哥哥𠵱家見到叔伯都一樣叩頭，佢話八叔李福善就好客氣，猛話唔使，但佢哋一於堅持叩到底。
阿瑟王愈講愈感性，講家庭對佢嚟講最重要，如果無家人佢就會好寂寞，所以當年太太生cancer，佢曾經同董特首請辭，但係佢太太覺得做教育好有意義，好支持佢，佢先之無走到。
任期下年就屆滿，阿瑟王話之後想寫好多故事，同人分享吓，佢仲覺得大家睇咗之後都會覺得好好笑，又叫人唔好事事太認真，要學識從樂觀同好嘅一方面睇。唔做教統局局長，佢話自己最想瞓覺，因為瞓覺係最開心嘅事，到時又可以唔使心掛掛。相信局長都唔想周圍同人講爭唔爭做特首，只係鍾意自己同周公分享！
傳真︰2623-9278
電郵︰[email protected]