香港政府部份部門將於七一實行5天工作周，等咗咁耐，終於有非官方機構響應，負責監管股票及期貨市場嘅證監會話，為咗同政府運作趨向一致，所以佢哋同樣會由7月1日起，實行5天工作制。
證監話，雖然佢哋一般辦公室運作將會喺星期六暫停，但投資者熱線會繼續接受電話查詢，亦會如常收取星期六送交證監嘅文件。
其實𠵱家星期六都冇股市，港交所亦一早行咗5日工作制，所以證監跟住做亦好理所當然。既然返5日工，證監職員平日嘅辦公時間就會延長，令總工作時數維持不變。
主席韋奕禮話，預期生產力將維持現有水平，甚至因為士氣提高而有所改善。近年證監職員流失率幾高，佢話改行5天工作制後，可以算係一個吸引嘅工作條件，有助挽留及招聘人才。