小初近排晚晚都睇波，同一時間亦晚晚食消夜，女朋友作出驚世預言，話世界盃打完之時，正係小初變成肥佬之時，唔重10磅都起碼重8磅，小初因此靈光一閃，想搵食品股買吓。
經紀黃話，本地餐飲股中，佢最鍾意大家樂（341），因為平日幫襯得多。但若追求短期回報，佢就認為福記食品（1175）可以一諗，皆因隻股今年以來累積跌幅甚大，但查實基本因素唔弱。福記將在6月28日公布全年業績，據講盈利表現亮麗，隨時有超過5成升幅，有機會被芬佬調高評價。
福記股價自今年初見過20元高位後，一直積弱，據講原因係來自以前發行落嘅可換股債券，持有人換股沽貨食糊。原本福記股價在15元水平尚算穩陣，但好衰唔衰撞正早排大跌市，在風聲鶴唳下，股價居然跌至12.40元的低位，確實叫人驚訝。可能因為跌得多，上周五大市急彈，股價亦急彈12.69％，收14.65元。
慕容小初