所謂上場無父子，球員為咗隻大力神盃，個個爭到頭崩額裂，受傷真係在所難免。好似撞爆眼角同鼻骨裂呢類都係小兒科，有時唔夠人爭嗰陣，批踭、起飛腳、人肉三文治呢類揦渣招就大派用場。
不過呢啲都係皮肉之苦，點都唔夠俾個波省中下陰咁慘。好似射罰球嗰陣，球員排人場淨係用手護住下體，好唔穩陣，有時跳高一縮開手就中招，認真慘情！
講真，軍醫入到場又有咩用，極其量都係用凍水幫球員減輕痛楚，其實都係愛莫能助。有時我見到班球員痛到標眼水，淨係識得喺草地上面碌來碌去，都幾戥佢哋慘。
我喺度諗，如果班球員因為咁而有心理陰影嘅話，咁樣保險有冇得賠先？話晒佢哋都係因工受傷，好應該賠番醫藥費畀佢哋，彌補心靈上創傷。
彭浩翔
電影導演