劉德華前晚與歌迷聚會兼與父母親預祝父親節，華仔找來林家棟一同表演「刀插不死」及「空心人」等魔術，看得劉爸爸和劉媽媽大拍手掌，在場2000多名歌迷更齊齊尖叫搞氣氛，場面熱鬧又溫馨。
昨日父親節，劉德華因要到上海出席上海國際電影節，無法陪父親同度節日，不過他前晚便與2,000多位歌迷慶祝華仔天地歌迷會踏入18周年，及邀請父母出席，順道預祝父親節。
父母拍爛手掌
華仔特地請來旗下藝人林家棟到場，與他一同表演魔術給父親及歌迷欣賞，雖然魔術不算特別，但誠意搭夠，加上二人不時搞笑，看得劉爸爸與劉媽媽及歌迷們拍爛手掌。
當家棟表演刀插華仔時，他的手有點發抖，華仔則坐在箱內不停狂笑，每次家棟插他時，華仔都故意發出慘叫聲，歌迷們也跟着尖叫，家棟便愈見緊張，最後更插不下去，要魔術小姐幫手，華仔父母就不停大笑，事後家棟說：「玩就玩得幾過癮，我一生人第一次用刀插老闆，我老闆仲要係劉德華㖭，最初歌迷會叫我嚟話表演魔術，我一口答應，點知綵排時我先知要插老闆，真係好驚㗎，手都震埋，老闆叫我唔使手震，插啦，點知我愈插愈震，插到有個位好難插，咪要人幫手囉。」
玩完「刀插不死」後，華仔又讓家棟在身上亂摸一輪，表演「空心人」魔術，家棟竟在華仔身上拉了一位女助手出來，歌迷歡呼大叫。華仔後來表示：「呢啲只係小魔術，喺專業魔術師眼中係雕蟲小技，希望我第時學到多啲，可以再表演畀歌迷睇。」
讚克勤表現佳
提到好友李克勤近日主持世界盃節目是非纏身，問到華仔可會將「刀插不死」絕技教給他，華仔勉勵克勤說：「我晚晚都有睇克勤主持節目㗎，佢做得好好，將成個節目氣氛同流程維持得好好，係個好稱職嘅主持，叫佢繼續努力啦！」至於會否教克勤變魔術，華仔語帶雙關笑說：「我相信克勤已經有金剛不壞之身，佢想學我可以隨時教佢，插極都唔死嘅魔術好易，我仲可以教埋佢刀鋸美人，同埋將唔好嘅嘢變走，唔開心嘅嘢忘記佢，日日都過得開心，下次歌迷會請埋佢嚟玩啦！」
撰文：蔡如玉
