要買平貨自然要付出代價，去花園街同旺角中心的舖仔買衫雖然夠晒平，但最慘就係冇得試，即使你買起全場「最貴」的外套或者裙同褲，Sorry，一樣冇得試。花園街不明文規條：1.先畀錢再試（成條花園街得幾間舖有試身室）；2.完全無試身室的，得，唔該返屋企試完3日內返嚟換；3.撞啱你買正嗰款返嚟換時賣到斷貨，咁Sorry喇，唔該你揀番同等貨值嘅嘢！不設退款。
所謂有辣有唔辣，買得平嘢就要預咗唔會好服侍，不過一樣有辦法解決。好似記者呢類1個月去唔到5次旺角的人，返去試咗唔啱再搭車去旺角咪又係嘥車錢，所以醒各位女生一條好橋：幫襯完之後，嗱嗱聲去附近的試身室即刻試着，若然唔啱都可以即時返舖頭換嘛！
試衫地點：
1.最就腳最近花園街的一定係始創中心同旺角新世紀廣場的Toilet。
2.旺角朗豪坊及旁邊朗豪酒店的Toilet可以話係全旺角最乾淨，不過腳程就略嫌遠咗少少。
3.有經驗人士就醒醒你：去有試身室的連鎖時裝店扮試衫，順便試埋剛才在花園街的貨！聽落未嘗不是一個好辦法。
4.最易搵就係麥記、大家樂、大快活等快餐連鎖店Toilet，不過衞生程度就麻煩你屈就吓。