父親節對立法會一眾男議員嚟講，查實同平日冇乜分別，都係要一日趕幾場搞活動，最多夜晚就同屋企人食餐飯。三個男議員張超雄、梁大狀同郭家麒醫生喺噚日父親節正日，就係喺裙拉褲甩情況下度過喇。
家有三個寶貝仔女嘅張超雄，噚日為咗虐老同添馬艦問題，孤身走咗四場活動；由晏晝走到傍晚，唔攰就假嘅，但佢話一朝早三個仔女就同佢講咗句父親節快樂，搞到成日都好冧，所以都唔覺攰，而佢夜晚都預留時間同屋企人共敍天倫。
梁大狀噚日出席完添馬街頭論壇，就急急腳走人，點解咁急？當然唔係人有三急，查實係因為屋企人安排咗父親節慶祝飯局；身為主角，又點可以遲到，所以大狀梗係要快快向屋企人報到啦。
同樣都有出席添馬論壇嘅郭醫生，同大狀嘅心急程度都不相伯仲，不過佢趕去食飯前，要辦妥一個重大任務先，就係代表家人買份禮物畀年屆70高齡嘅老竇。問到有乜心水之選？佢話自己好實際，所以通常都係買皮帶、銀包同鬚刨等禮物，相信老竇都覺得實用喎。
傳真︰2623-9278
電郵︰[email protected]