孫柏文以前喺花旗國讀大學嘅時候，曾經有過個非常之喜歡睇電視嘅同房，亦即係番鬼佬所講嘅roommate。我記得當時呢個同房最鍾意睇嘅電視節目，係一個自稱為「傳媒之皇」（Kingofallmedia）嘅HowardStern，主持嘅清談烽煙（phonein）節目。呢個HowardStern嘅電視節目，其實只係將佢每日有超過1700萬觀眾收聽嘅晨早收音機節目，順手用攝影機拍攝，之後擺上電視播。
大家可能會問：「佢咁成功，係唔係因為佢好似我哋特區嘅鄭大班一樣，可以成功捕捉民意尖端去批判時事？」估得好，不過錯！HowardStern喺花旗國咁成功，全賴佢講同播嘅嘢夠晒出位。大家可能會追問：「有幾出位呀？」見大家求知慾咁強，我都好開心，等我用隻金手指幫大家篤個比較典型嘅例子出嚟。有一次，有個女性聽眾打電話入個節目，HowardStern就要求同佢玩「電話性愛」（phonesex），個女聽眾亦都應承同佢玩。HowardStern就叫個女聽眾將電話聽筒放喺大髀之間，緊貼「那話兒」。然後HowardStern就開始發出令到聽筒震盪嘅低音，直至那個女聽眾喺現場直播嘅環境下達到高潮。
道德保衞者施壓
當然，大家可能覺得花旗國係個非常開放嘅國家，咁傷風化嘅嘢，喺FM收音機聽到絕對不足為奇，仲有，佢幫電台搵咁多錢，一定做乜都得。某程度上呢個論調都係啱嘅，不過，後來「道德保衞者」牛仔總統喺千禧年上台之後，花旗國嘅聯邦通訊委員會（FederalCommunicationCommission）就開始畀壓力落啲電台。其中一個通訊委員會最喜歡嘅手段，就係罰款同威脅吊銷電台牌照。
去到05年，HowardStern開始頂唔順通訊委員會嘅打壓，宣布退出FM收音機節目行列。當然，HowardStern嘅fan屎非常失望。不過，科技一日千里，審查員可以「支配道德」嘅渠道愈嚟愈小。近年，花旗國興起衞星轉播收音機電台，喺衞星轉播世界係冇「草木皆兵」嘅審查員，所以「傳媒之皇」亦轉到衞星轉播世界，繼續佢嘅清談烽煙節目。畀HowardStern同佢啲fan屎繼續體驗花旗國憲法保證嘅言論自由。
用科技戰勝審查
大家可能覺得，孫柏文今日為大家篤呢個花旗國故事出嚟，好似同特區冇乜關係。其實，大家都知道我對「科技」戰勝「審查」有無比嘅信心，我本人其實都係啱啱被封殺電台主持人森美、小儀嘅fan屎。
當年我仲係股票分析員嘅時候，每個下午，我就會好似好專心咁望住電腦螢幕，眼都唔眨，因為我兩隻耳仔都插咗聽筒，收聽森美、小儀嘅電台節目「架勢堂」。不時就會爆笑，令到股票研究部嘅主管耐唔耐都會走過嚟問我：「笑？有乜咁好笑？你又喺度睇邊間公司嘅年報？」
我今日同大家講我係森美、小儀嘅fan屎，唔係想懷念過去，而係希望森美、小儀用互聯網科技去戰勝審查員，繼續為我哋特區人民帶嚟歡樂。最後，為咗支持言論自由，我今日就投神聖嘅一票－－我最想XX嘅女藝人就係小儀！
孫柏文