男人玩車，10個有9個都貪新鮮，最好係每個類型都試勻，但肥仔聰卻是第10個，即使已經擁有1部HARRIER，但換車的頭號目標還是新款凌志RX350，能得他垂青，梗有把炮之處。試完車後，我發覺呢部車就同佢喺《少林足球》識得享(輕)功水上漂嘅六師弟一樣，外形超大碼，但行動輕盈爽快，唔會拉牛上樹，難怪六師弟話佢係部媾女車。
記者：黃婉冰 攝影：黃子偉
肥仔聰評語：RX350外形有豪華感但又唔會過份浮誇，性能拍得住同級嘅平治同寶馬，但價錢平好多，抵揸！起步時雖然柔咗少少，但當你想佢快時佢又可以即時快畀你，揸起嚟得心應手，就算踩到佢盡都唔會出聲，舒適度都OK。
行車：慢法拉利秒半
肥仔聰本身已擁有豐田HARRIER，揸「蝦仔」幾年依然情有獨鍾。「呢架個轉數比我自己嗰架高，操控時個質感強，雖然起步時有少少柔，但想佢快時佢又可以好快，坐滿5個人唔使去到地板油都已經好夠力，操控時幾得心應手，0-100km只要7.8秒，1架貴佢2百幾萬嘅法拉利都係快佢秒半，問你死未，同埋佢個引擎好靜，唔似得我架HARRIER，一踩到盡，個轉數高啲已經好似隻牛咁，又嘈又震又響胎！呢架車身再高少少，睇位仲易啲，難得係個幾銀錢1公里，慳油夠舒服，其實我都試過幾隻牌子，得呢架豪華得來唔會有種炫耀嘅感覺，我對凌志呢架車幾有好感。自己亦鍾意大車，易睇位又夠型，HIPHOP友係咁㗎，Performance？唏，用嚟溝女之嘛，要快就買『露筍』，我係會以舒服行先。」喂！唔係個個女仔都鍾意速度男㗎，有陣時架車穩穩陣陣，反而可以畀個女仔1種安全感，Yougotit,man?
車廂：唔夠高設備有進步
自問亦非苗條之人，所以我亦深明何解肥仔聰一定要以舒服行先的要求，但見他坐上司機位時，差少少已經頂頭，RX350都有令肥仔聰不滿的地方。「車廂個空間感同我架差唔多，唯獨是坐入去時個Headroom感覺矮咗少少，但左右兩邊就闊落咗，設備有進步，個中控台都靚咗好多，尾箱又大咗，特別係個天窗，頭先我見到個咁大嘅天窗時幾興奮呀，因為我唔係咁鍾意開冷氣，尤其是夜晚開車返屋企我都鍾意開天窗，呢個天窗可以連後座乘客都享受得到，同埋我估唔到佢套音響可以咁掂，舒適度都好OK。」
外形：車尾「吉」咗少少加尾翼包圍仲正
訪問到此，好想問肥仔聰：「論大架，比RX350更大更霸氣的大有車在，好似大型4驅車LANDROVER，夠大喇啩、波子Cayenne，夠晒型喇啩，何解咁多選擇，偏偏揀中佢？」「我都有試過LANDROVER同Cayenne，但LANDROVER個感覺鋼水太過勁，成隻牛咁，Cayenne個外形又好係鬼佬style，我最鍾意佢個款Jeep得嚟又有少少跑味，鋼水又好，但唯獨是稍嫌佢個籮柚(車尾)「吉」咗少少，如果係我會加番套包圍同尾翼，咁樣會型啲。」
RX350Specifications
引擎：3,456c.c.V6VVTi
馬力：270ps/6,200rpm
扭力：342Nm/4,700rpm
傳動：5前速半自動波
車價：$434,985
車輛提供：皇冠汽車（25119430）