特首曾蔭權正在為連任奔波，但「親疏有別」論、同埋有無參加過89年《民主歌聲獻中華》嘅羅生門事件曝光後，令到當奴嘅民望有啲變化。噚日八方去咗一個研討會，曾特首嘅細佬，亦即係前任一哥曾蔭培發表演講，講咗題目係「我加入商界後看到的香港」。
曾蔭培話，近排佢睇咗本小說叫做「NumberTen」（硬譯可以譯為唐寧街10號，即係英國首相府的地址）。本小說嘅內容係虛構嘅，講首相貝理雅（TonyBlair）向外報稱要參加模擬戰爭，而消失咗10日，實情係佢同一個駐守首相府嘅警察「微服私訪」民間，體察民情，而呢個小說中嘅貝理雅仲要扮女人㖭！
懷念做一哥日子
前一哥話，呢本小說都幾好睇，佢已經推介咗呢本書畀佢嘅特首大佬睇。至於當奴會唔會扮女人，佢就唔知啦！其實中國自古以來都有好多皇帝微服出去體察民情嘅古仔，八方諗曾特首唔使要呢本小說教先識得咁做，但係扮女人條橋又真係幾好，若果真係肯豁出去扮女人，又真係好難認得到喎！起碼唔使同熟人打招呼，唔驚俾人話喺啲乜嘢場合見過，十幾年後仲俾人摷出嚟講！
除咗好書推介外，曾蔭培噚日仲話，𠵱家佢脫離咗公僕行列，去到彤叔嘅新世界搵真銀，但佢都好懷念以前做一哥嘅日子。佢話以前出差有先頭部隊幫佢攞行李去機場，之後佢施施然咁用VIP通道登機，要幾威有幾威。𠵱家出差，佢話要自己拖個空姐喼，晨咁早趕去機場！八方聽落都覺得有啲由天堂跌落地獄嘅feel！
仲有，呢位前一哥都算唔話得，喺個speech度明明暗暗讚咗個大佬好鬼多次，連當年煲呔喺沙士嗰陣被貶為清潔大隊長，都話若果唔係咁，香港𠵱家又點會咁清潔呢！八方聽完佢講，覺得如果有個咁識做嘅細佬就好啦！
不過，呢個細佬都表達咗一啲佢唔滿意嘅地方，佢話兩鐵合併，會對其他公共交通工具構成壓力！八方明嘅，食君之祿，擔君之憂，真係大佬都無面畀！至於個大佬，係咪應該學細佬推薦呢本書咁，微服搭巴士體察民情呀，至於扮女人，八方諗特首你咪玩啦！
爆料熱線：29290000、27860099
報料傳真：26239278
報料電郵：[email protected]