改編自真人真事，一隊駐紮在南極的探險隊遇上暴風雪，被迫先行撤退留下8隻雪橇犬；主角雖與8位戰友情同手足，可惜因人力物力不足等問題，遲遲未能折返拯救，令他自責不守承諾，一去冇回頭。與此同時，雪橇努力自救，要諗計覓食，又要被迫放棄老弱同伴，不斷上演人生交叉點。狗要抉擇，人生同理，世事逼人，又有幾多盡如人意的團圓結局出現？
記者︰陸俊雄
鏡頭背後 大爆狗替身內幕
拍戲嘅人話，細路與狗最難拍，大家見戲中雪犬交足表情，實情要用半年時間訓練狗隻。在「特別收錄」裏面，主要講述戲中人要同狗溝通，又要培養感情，更會大爆1隻狗演員要用上4個替身，以及導演大讚用格陵蘭代替南極實地拍攝，效果一樣咁靚。至於在「刪剪片段」中，可睇到從未曝光的超靚雪山畫面，42"Plasma睇超正。
隨碟送狗砌圖
據碟場人士透露，6月世界盃開波，令本來「五窮六絕」的售碟情況，更為雪上加霜。不少荷李活大製作的影碟為避世盃，紛紛延期推出。可能雪犬愈冷愈強，在世盃影響期間做出一日熱賣60至70套的佳績，一狗當先。
其實發行商為此戲花了不少心思，DVD隨碟附送狗公仔立體砌圖，像早期某便利店曾送過的，不過換上長毛雪犬造型。此外憑碟前標貼，更可到指定商戶拍攝寵物證件相，實行吸引一眾愛狗之人掃碟。
4幕必睇情節
雪犬爭食 惡戰海豹
雪地白茫茫，人又走清，估不到生了一幕雪犬與海豹爭食鯨魚肉的場面。雖然海豹是模型加上CG效果，但咁都俾編劇諗到，又嚇到觀眾，值得一讚。
超難！狗拉繩索救人
另一幕是教授跌落水中，有點鐵達尼阿Jack的感覺，狗女瑪雅一招繩索救人，拍攝難度有9分，真係唔知拍咗幾耐先有呢個咁感人效果！
雪橇唔聽話闖禍
片中沒有大雪崩，但有幾幕狗救人場面幾感人；好像電影初段，8狗突然不聽指示，把雪橇拉離航道，害到教授差點跌進冰隙下，最終眾狗知衰拉他出險地。
「狗」別！重逢！
重回舊地，主角發現一條死狗，眼淚即流。但細看發現，鎖鏈上只剩下狗帶時，知道愛犬仍有機會未死，笑到出面。回頭再看，雪犬興奮地衝緊過來，大團圓到不得了。
舊戲比對：《南極物語》苦了華太犬
《極地雪犬》的藍本其實來自《南極物語》，這套日本片在1983年上映時勁收59億日圓，絕不簡單。故事改編真人真事，1958年日本的越冬觀測隊在南極遇上暴風雪，15隻華太犬被棄在南極，而且頸帶沒有解開，最後15隻死剩兩隻。此片可說是《極地雪犬》的殘酷版，華太犬有被浸死、跌落山死，頭破血流又有。難怪一直俾人質疑拍攝過程中，出現日本導演殺狗事件。
