是日推介——吃得落肚的牛皮燈籠，不明？牛者，牛肉也；皮者，粉皮也；燈籠者，燈籠椒也。「越滋味」總廚周師傅好諗頭，配搭以上三種食材，一搓一包一蒸，皮薄餡靚的牛皮燈籠立即呈現眼前，香噴噴熱辣辣想第一時間放入口？別心急，蘸點不腥的魚露吧，酸酸甜甜保證更醒胃！
記者︰方綺君
攝影︰陳盛臣
解說
「牛皮燈籠」歇後語是「點極唔明」，相對成語、諺語，用字比較通俗兼口語化，更添幾分幽默感。語帶雙關揶揄人頭腦不靈，多番解釋也不明所指，笨人、蠢人、反應遲鈍的人，通通可以叫做「牛皮燈籠」。
越南師傅坐鎮
越南雖地近中國又曾是法國殖民地，飲食文化卻難得地沒變成「小中國」或「小法國」，能夠完美地融合異國飲食文化兼維持自己特色。越南人秉承中國講求陰陽調和的飲食文化，着重清爽原味，多數用蒸煮、燒烤、燜焗、涼拌等烹調方法，遇上被認為是較「上火」的炸或燒烤菜式，則配可生吃的菜葉一同食用，以達到去油「下火」功效。
「越滋味」新開業兩星期，位於「銅鑼灣女人街」渣甸坊，位置不在大街，但午晚市時段仍不愁生意，原因只得一個──味道好！店子用一貫經營飲食業的食糊方程式──賣越南菜，就用越南材料和請越南師傅，Sell地道正宗，花心思靠真材實料。大廚周師傅是越南人，有28年入廚經驗，做到一手正宗越南菜，負責人陳先生則是個小小「越南通」，因工作關係曾在越南居住數年，被越南菜吸引，後因認識當地飲食界朋友，造就他獲得上等越南菜材料的入貨渠道，因此店中大部份食材都比其他越南店舖優質，用料靚，食物味道當然加分。
牛皮燈籠4粒$28
新鮮牛肉加香茅，混鮮艷的燈籠椒粒，用粉皮包着蒸熟，蘸秘製魚露吃，保證啖啖鮮味！市面一般的魚露或多或少多有點腥味，師傅自製的魚露卻一點也不腥，味帶酸甜食完一粒又一粒。
生菜牛肉包濱海$38
新菜式，灑上蒜粒的牛肉食味更搶，用米粉絲做成餅狀的濱海口感很煙韌，包生菜蘸魚露吃又是一個消暑菜式。
招牌特級牛肉湯河$28
正宗越南配方，湯底用上等牛肉、牛骨、花椒、八角等十多種材料煮10小時而成，湯清不濁，加少許金不換更香。
黑椒牛柳粒紅米飯$48
夏天熱賣菜式，味道酸酸辣辣惹味開胃，牛柳粒彈牙，紅米飯對腸胃有益，可口健美，女生們至愛。
越式牙車快$36
「牙車快」即越南地道沙律，用雞肉、牛肉或豬肉加青瓜絲、紅蘿蔔絲製成。混用酒米餅、雞汁、白醋、指天椒、蒜茸製成的冧汁吃，味帶少許辣。
越式三寶飯$36
夏天無胃口吃飯？試試這個吧！有辦你睇三寶即香茅豬扒、雞翼和扎肉，加秘製魚露味道變得甜甜酸酸，最能刺激食慾。
越式炸春卷$25
陳先生建議蘸汁醬或魚露，個人認為就算不蘸汁醬一樣出色，入口香脆，包生菜及金不換同吃又是另一種風味。
廚師烤蔗蝦$38
越南名菜蔗蝦，由切蔗到打蝦膠至調味，通通由師傅一手包辦，蝦肉彈牙入味，口感一百分。
越南法式蒸餾咖啡
熱$16，凍$22
咖啡粉從越北進口，烘焙後放入古老漏斗加牛油再磨成粉末，以20世紀法國非常流行的滴濾方法製成咖啡，加煉奶喝，比一般茶餐廳的咖啡香一百倍。
獨家米紙
米紙特地由越南訂回來，比市面一般米紙薄3倍，價錢貴1倍，炸起來特別香脆，咬落卜卜聲，適合用來包春卷。這米紙在香港的越南雜貨舖無得賣，成本貴其他餐廳亦多數不用，獨家貨值得一試。
食客有Say
搵食攻略
越滋味（28902582）
地址︰銅鑼灣渣甸坊48號4號舖
營業時間︰11:00am-10:00pm
交通︰銅鑼灣地鐵站F出口
座位︰36個，午市及下午茶時段最多人，每晚6:00pm開始出現人潮，要排隊等位
人均消費︰$30-$40
有着數︰外賣、晚市堂食有9折優惠；午市、下午茶及晚市提供套餐，份量多夠抵食，新張期內惠顧會送優惠券
