梁漢文創作之晶
「呢條頸鏈係我行街時買，其實我都唔記得係水晶定係石，但係因為我覺得粒石好靚，粒石仲要兩面都有唔同cutting，一面就係又滑又令，另一邊就係磨砂不規則形狀，真係幾特別，當然最重要係呢粒石係可以幫助創作靈感，對自己各樣嘢都好。」
吳卓羲一物二用
「我有個習慣，就係每拍一套劇就會買一隻錶，用來襯番劇入面角色。呢一隻我就係特登買嚟拍《突圍行動》，加上我又鍾意手錶，算係最好嘅飾物，我𠵱家都儲咗十幾隻。我記得最貴一隻錶大概要八萬蚊，我姐夫好錫我，有時都會借錶畀我戴，呢隻錶本來都唔止呢個價錢，係姐夫幫我買，先買到咁平。」
王浩信皮繩壯陽
「平時着乜嘢衫都係公司同事安排，所以自己唔使操心，不過間中都會加啲飾物嚟襯衫。而呢條皮繩喺舊年買嘅，我好鍾意戴呢類皮繩嚟襯衫，感覺幾man，因為我本身陽剛味唔重，所以揀首飾時特別鍾意比較man啲款式。另外今年會好興金色同鏽色嘅手鈪，所以我都入定貨。」
方大同特色珠鏈
「我覺得呢條鏈啲珠仔size唔太大又唔太細，個size啱啱好，而且隻顏色都好特別，通常喺街見到嘅都係銀色，但係我呢條鏈嘅顏色就好似氧化咗，比較特別。其實𠵱家好多男仔鍾意戴呢類鏈嚟襯吓衫，因為男仔都比較少戴一啲誇張嘅飾物，而呢類型嘅鏈就夠簡單，又容易襯，我就最鍾意。」
採訪、攝影：駱華齡、仇志德、楊潔雯、李珮洳
