劉德華今日要往外地工作，雖然對他來說每天都是父親節，但仍不忘提早和家人食飯慶祝，兼且預計送一套戲的片酬（約1,000萬元）給父親，華仔說：「爸爸都幾要求高，今年冇時間陪佢買禮物，所以我決定將七月開拍嘅戲嘅片酬送畀佢，等佢鍾意乜就買乜。」
照顧了家中的親人，華仔不忘在這個日子，關心一些有需要的老人。日前掛起黑色暴雨訊號，華仔仍抽空到耆康會關泉白普理護理安老院，與一些身體較弱、或是子女不在港的長者提早慶祝父親節。
華仔不時蹲下來與老人家傾偈，又拖着對方飽歷風霜的雙手，場面溫馨。華仔又滿場飛和長者們玩遊戲，他先和50位長者做體操熱身，之後與他們玩射龍門，讓他們感受世界盃氣氛。華仔負責守龍門，數位長者一同射波，華仔即瞓身撲球，其狼狽相引得一眾長者捧腹大笑。
為耆英剪髮
在問答遊戲中，華仔遇見一位舊鄰居婆婆，更被她「大踢爆」，她說：「我係你鄰居喎，你認唔認得我呀？我記得你以前開間燒臘舖，你媽咪好想做星媽嘅，不過你細個都好乖仔。」華仔被公然揭穿兒時生活不禁失笑。此時另一位耆英拿着華仔的照片說：「華仔，你係我偶像，你幫我簽個名，我想點唱呀！」不過老人家卻點了一首葉蒨文主唱的《瀟洒走一回》，弄得華仔哭笑不得。
華仔又變身魔術師，表演多個魔術𠱁老人家，之後還為數位耆英剪頭髮，其中一位伯伯理髮後舉起拇指說：「very骨（good）。」華仔說：「呢班上咗年紀嘅小朋友好熱情又好貪玩，同佢哋玩得好開心，而且仲見到舊街坊，好彩佢冇亂講我咋，仲讚我乖。
「父親節其實我哋應該不忘天下所有父親，未必個個都咁幸運，我哋好應該關心吓佢哋，今日我就同佢哋玩遊戲同剪頭髮，我幫其中一個老人家剪咗個劉建明（華仔在電影《無間道》的角色）裝，另一個就《2046》嘅梁朝偉裝，等佢哋開心吓！」
攝影：葉君海
