中村英壽：招積域，幫我叫份奶油多啦，你應承過請我食早餐㗎。
招積域：知啦，澳洲贏得日本2球，我梗會請你食嘅。今晚對克羅地亞喎，要出線睇今場啦，但睇怕都係輸多㗎啦，推介買個「大」同埋2:1波膽。
中村英壽：中村俊輔帶傷上陣，情況唔係咁樂觀啦。上場輸咗之後，國內傳媒話「我哋欠一個卡卡」，證明日本根本冇一個前線殺手，對克羅地亞入到波都算係咁喇。
菠蘿文：日本最鍾意學人，但就學唔到巴西最好嗰樣，就係前鋒殺手；雖然克羅地亞𠵱家讓到半/一，但應該都可以開到個上盤，再補埋波膽2:0。
招積域：照你咁講，克羅地亞咪即係是日穩膽？用嚟串吓其他波都好喎。
中村英壽：巴西嗰場仲穩陣啦，澳洲教練軒迪克放風話會收起幾個有黃牌在身嘅球員，擺到明係想留力，喺最後1場對克羅地亞嗰陣先搏盡！巴西單W可以一試。
菠蘿文：即係話艾萊斯同埋卡希爾今場會缺陣？咁既然個W熱到得1.22倍，不如試吓玩「首球」啦，我推介大哨同細哨，卡路士亦都係冷門之選。中村生，你又點睇呀？巴西隊都算係你半個老師吖。
中村英壽：我就會揀卡卡冧莊「首球」喎，有6倍分頭都算不俗，再補多個21倍嘅比斯安奴做冷腳。
菠蘿文：大家都搵巴西嗰場做重心喎，咁我少少哋買「主勝」支持吓啦，有1.65倍，再加埋噚日侍仔嫂推介嗰場南韓「客勝」，玩吓混合過關2串1。
招積域：我就簡單些少，克羅地亞W串巴西W再加埋法國佬和波，3串1有7倍，都幾好分㗎。
文：高洛文