李國麟在娛樂圈打滾31年，第一次做主角是27年前的事，當年與60年代粵語片明星陳齊頌拍咀戲令他畢生難忘。身手矯捷的李國麟原來還當過特技人，表現出色。雖然不曾大紅大紫，但李國麟早已視演戲為終身職業，他說：「呢份工養咗我咁多年，我仲要靠佢養大個女。」 撰文：比華利
李國麟第一套參演劇集是鍾景輝編導的《清宮殘夢》（75年），男女主角是張之珏及汪明荃。李國麟扮演小太監，起初導演只吩咐他全程站在皇帝身邊，後來見他表現良好，於是讓他講簡單對白。李國麟憶述拍攝前一晚的心情時說：「拍嘅時候我個心驚到想要跳出嚟咁滯，前一晚仲發晒開口夢㖭！」
三年後，李國麟終於一嘗做主角滋味，在單元劇《的士司機》（78年）裏飾演的士司機，更獻出螢幕初吻。劇情講述他接載了女乘客陳齊頌（粵語片女星、曾主持無綫節目《婦女新姿》），兩人更發展一段不倫之戀，情到濃時嘴對嘴親熱。二十多年前，拍咀戲已經很大膽，李國麟說：「要我咀落陳齊頌嗰度，我真係成身都震晒，好緊張，最終頂硬上拍完。」
曾夥阿Sam拍大片
由靠邊站的小太監，短短三年內變成有對白有戲份的主角，只是很快便從一線退下來。李國麟說：「我從來冇因為做唔到主角唔甘心，我尊重份工，份工亦尊重我，就算做到觀眾心目中嘅主角又點，嗰啲係富貴浮雲，好虛無。人哋可能付出比我多，個樣可能係靚仔靚女，天生一副明星相。我唔會認同自己係明星，我只係一個演員。」眼看不少曾合作過的藝人都先後上位，他淡然說：「𠵱家有時喺宣傳活動，我都會行埋一邊，人哋等上位，唔通我仲阻住晒咩？」
李國麟年輕時曾兼任特技人，更曾與幾位志同道合的友人組成特技隊，為多套電影擔任特技工作，許冠傑（阿Sam）主演的《最佳拍檔》就是其中一部。李國麟說：「當年我同阿Sam雖然同一部戲演出，但都冇乜互動，或者當時我哋好陶醉喺自己嘅世界裏面，做到特技效果就好滿足，其他嘅嘢都冇理咁多。」
食阿爸住阿媽維生
過了約五年特技人生涯，李國麟有感與拍檔們的熱誠都開始退減，加上不擅處理人際關係，惟有結束特技隊。
訓練班出身，轉眼在無綫已數十載，「老人牌」都拿了幾個，李國麟幽默地說：「我喺公司冇派系，得個耐字。我好記得74年入行，由藝訓班出嚟，得嗰600蚊月薪，全靠我食阿爸住阿媽，先到今日，都幾辛酸，但我相信知足常樂。」
如今李國麟除了要照顧年邁雙親，還要養妻活兒，而無綫年前改制後，薪金也變相減少了，他感慨地說：「呢行行頭愈嚟愈窄，仲萎縮緊，公司在商言商都會話你貴，減薪亦冇辦法。如果我𠵱家瓜咗，都大半生喺呢行，諗唔到轉行做乜嘢，加上呢份工都養咗我咁多年，我仲要靠佢養大個女。」
場地：NamcoWonderPark（世貿中心）
