大大賓架、私人銀行家之中無人不識嘅Monica竟然上咗《蘋果》新聞版，原因係伊人追討已預付之學費六千二百萬元。咁貴嘅學費，乜博士都讀到啦，但王小姐只係為咗學跳舞啫，而且全部跳舞學費，高達一億二千萬元㖭。蒙尼嘉有錢唔係新聞，伊人系出名門，身份高貴，銀行家之中，唔靠份人工花紅，都有咁多錢嘅，自然係李家、陳家、廖家、馮家、伍家、王家等等（排名不分先後）純銀行打工仔會係邊個？當然唔係鄭海泉啦，鄭大班嘅年薪，若與過往艾爾敦相同，會係一千七百萬元左右，即使全部唔使，做足七年，都未夠蒙尼嘉交學費。金管局任總裁年薪九百萬，要做夠十三年又四個月噃，扣埋稅以及生活費用之後，怕做足二十五年都未夠。以此觀之，蒙尼嘉係銀行界第一富有女士，殆無疑問。
肯用億二銀，學八年拉丁舞，即每年千五萬，睇嚟一年收入點都會有一億左右，其他賓架唔恨得咁多，人哋夠叻表現出眾，命水又好啫。有咁多錢而選擇跳拉丁舞為人生第一嗜好，每星期學習三十小時以上，可知人生大事之中，跳舞好重要。
嗰位外籍跳舞導師好發噃，一位有錢學生願意交千五萬學費一年，都唔係獨家教授㖭，仲可以兼顧其他學生，你話佢係幾咁搶手呢，唔怪得以前賓架C話過畀左丁山聽，有不少內地年輕英俊嘅跳舞導師來港搵食，提醒我哋注意老婆行蹤。當時有人同賓架C講：「唔使驚，我冇咁多錢畀老婆學跳舞！」哦，𠵱家明白佢哋講乜嘞，頂級跳舞學費原來會貴到咁。
兩年前有單新聞，倫敦高盛一位高層俾秘書偷咗幾百萬美元，懵然不知，直至佢要捐錢畀母校，發覺戶口唔夠錢，先至知道秘書已使出一招金錢大挪移。呢位投資銀行家賺錢特多，經常捐款做善事，唔見幾百萬美元，一啲都唔肉痛。好多中環朋友都以為花巨款學跳舞，純屬個人選擇，但如果能將部份學費捐畀公益金或大學，聲譽更好。