伍晃榮在無綫擔任體育新聞報道員23年，雖然每晚只能亮相兩分半鐘至三分鐘，但憑着獨樹一格的生鬼報道，讓觀眾留下深刻印象。退休將近一年，伍晃榮仍未能習慣退休生活，並為自己鋪排工作如寫書和主持世界盃節目等。談到其經典金句「波係圓嘅」，他表示絕非廢話，而是世事難料，無人能預知結果。 撰文：卓美娟
伍晃榮於82年加入無綫新聞部，去年6月30日是他榮休前最後一天上班，當晚的《六點半新聞報道》罕有地由這位體育新聞報道員來結束，而他為免傷感，只以簡單一句：「呢節新聞報道完畢，再見！」向觀眾道別後，燈光徐徐轉暗，伍晃榮正式離開工作了23年的崗位。
寫書廢寢忘餐
無綫一向非常注重新聞部員工的形象，多年來均嚴禁在職的新聞部編輯、記者及主播接受外間傳媒訪問，退休前的伍晃榮也只有唯一一次經上級同意，接受一份內地報章的訪問，其餘的訪問一一被他婉拒，伍晃榮日前接受訪問時說：「我係新聞部記者，又唔係藝員，同你係行家，有乜好訪問啫。」
伍晃榮退休近一年，但他尚未完全適應退休生活，他說：「雖然出鏡時間得幾分鐘，不過每個鐘頭都要自己更新新聞，由朝早9點做到夜晚7點幾，加埋由美孚屋企搭地鐵返工、放工，每日10幾個鐘頭，我同好多上班族一樣，都係夜晚唔願瞓，朝早又唔願起身返工，嗰時就諗第時退咗休可以日日唔使咁早起身，幾好呀！點知𠵱家晚晚將近11點就眼瞓，唔使返工就竟然每朝6、7點就醒，真係無奈！」
伍晃榮離開無綫將近一年，不過真正退休生活其實只是開始了幾個月而已，他說：「退休之後即刻開始寫書，本書就係叫做《波係圓嘅》，算係回顧番自己呢44年嘅工作，唔知當時點解有種咁嘅衝勁，好想快啲寫好本書，總之喺屋企食飯又寫，去廁所又寫，落公園又寫，兩個月就完成本書，之後就四周圍旅遊吓囉。
赴美探望乖仔
「我有兩個仔，一個已經結婚嘅喺香港住，一個未結婚嘅喺美國做同電腦有關嘅工作，有段時間咪過去探吓個仔囉！所以真正過退休生活其實係呢個幾月嘅事。」
不過，伍晃榮最近又應無綫邀請擔任世界盃主持，他對此說：「我做開體育新聞，講成場波肯定唔係我專長，叫我返嚟做，我都成日問，叫我返嚟做乜，佢哋同我講節目裏面會有phonein環節，咁又係事實嘅，直播節目必須要好生動嘅表達方法，先會吸引到觀眾。」
期待北京奧運
伍晃榮的下個目標是參與08年的北京奧運。回憶起64年時首次採訪在東京舉行的奧運會，至今印象難忘，他說：「嗰次係第一次出門，又係第一次搭飛機，居然開心到三晚瞓唔着，完成今年世界盃，我會等做08年的北京奧運，呢兩年大把時間休息啦！」看來伍晃榮的退休生活只是假象，繼續做自己喜歡的工作才是他的人生目標！
