唔知點解，德國呢邊啲媒體比較少報道今日筆者推介，由法國及南韓兩軍對壘嘅消息，無論係正面抑或負面都欠缺；反而巴西、西班牙、阿根廷及意大利等，就日煲夜煲。睇怕係德國傳媒認為法、南2軍並非今屆奪標真命天子，不屑一提。
呢日打完幾組次輪分組賽，有德國報章做咗最新球迷民意調查，的確顯示2軍都唔被睇好嘅情況。32路大軍民意排名，頭3位分別係阿根廷、西班牙同埋德國，法國排到第18；南韓呢？第17，仲高過法蘭西人。
民調排名南韓勝法國
事實上，法國上場面對住瑞士，苦無破門良方，主將亨利又遇上逢大賽腳軟之宿命乎？反而南韓人打道氣，上輪喺法蘭克福打早場，30幾度高溫下對住天氣啱晒嘅多哥，仍然能夠半場輸全場贏，難能可貴。
呢次華度並冇問到來自以上兩國嘅行家，點睇球隊呢場波嘅機會；事關法國佬一係溝通唔到，二係太過自以為是；南韓行家就普遍較為粗魯率直，難聽啲講無乜禮貌。好似搭車出出入入，南韓人唔知係唔識講定係唔講，唔該都無聲，係咁撞埋嚟，望下佢都好似想打人咁款。
不過，可能就係南韓人呢種「不卑不亢」嘅本性，對住咩球隊都冇有怕，呢場波法國繼續讓波，幾大試下南韓下盤。文：華度
採訪隊推介
華度心水：南韓下盤