方力申--最鍾意
「傳咗幾年，好事嚟嘅，我同佢幾傳奇，呢行好少螢幕情侶，我哋合唱過《好心好報》、《好好戀愛》，大家鍾意睇，又覺得幾襯，睇落好舒服，開始都冇理係咪真，已經當係真，fans鍾意我哋繼續合作，連fans都接受埋，作為一個新組合好成功，要keep住關係。」
古巨基--最快完
「同佢直情搞笑啦，唔知點解會同佢傳嘅？啲人寫嘅嘢，九成九都唔係真，我都覺得好奇怪，同佢合作過一次舞台劇（03年尾《森美小儀大衞營》），大家同公司，就係咁，冇證冇據都講，都唔知乜事，寫完一輪就好快無疾而終。」
陳冠希--最可疑
「呢個傳好耐，拍《9個女仔1隻鬼》套戲時開始傳，我同佢係朋友，佢係靚仔，係多女人鍾意嘅，但佢好勤力做嘢，唔算花弗，鬼仔性格熱情啲啫。我有收過佢sms，合作嗰排有聯絡，𠵱家唔多，大家都忙喇。邊個唔鍾意靚嘅嘢？但揀拍拖唔一定揀個靚嘅，尤其我需要穩定。」
鄭中基--最搞笑
「唔算係緋聞喇，我當宣傳咋，成單嘢好搞笑，我哋係拍電影《龍咁龍2003》嘅時候俾人傳，佢係我同事，同公司會成日見，私底下冇約出嚟傾偈，梗係冇單獨約會啦，就算拍戲嗰排，都係一班人食飯㗎。」
雷德賢--最救命
「咁多個入面，呢個經典到爆，嗌晒救命，太屈喇。連朋友都唔知稱唔稱得上，好冤枉，影咗一張坐喺佢隔籬嘅相咋，最慘呢個人就喺我棵樹度（指緋聞表），嗰排有好多謠言，話我係個貪錢嘅人，傳緋聞唔緊要，連我人格都講埋，感情好混亂咁，成件事好差。」
