前日參觀咗肥媽喺火炭嘅新廚房，廚櫃、雪櫃樣樣新簇簇，唯獨係啲廚具係舊嘢，肥媽話：「呢啲廚具都係老公同仔女四圍搜括番嚟，係愛心廚具，收到時仲開心過收鑽石呀！」
坑紋愈深愈好
好似呢個煎pan咁，肥媽就好有研究喇：「買pan一定要有凹凸坑紋，而且愈深愈好，等煎牛扒時啲脂肪油沉晒落坑裏面，咁就唔使搵張紙吸油咁麻煩啦！」亦由於接觸面較少，無鋁鑊咁易黐底，仲可以煎到有交叉炭燒feel㖭！
點揀：
．拎上手要重身；太輕通常好易煎燶嘢；
．唔好揀可拆手柄嘅煎pan：「拆得多都會鬆啦！」
保養：
．用海綿或軟布代替百潔布，否則容易刮花
．只用一滴洗潔精，「啲易潔鑊用少少洗潔精一抹就甩，要咁多泡做乜？」