銀建（171）最近1年大致喺2元至2.65元上落，呢期股價倒水，跌近兩蚊「鋼鐵長城」價，又可博佢彈彈。最近半年，銀建大股東Catic及第三大股東銀建控股，齊齊出手，分別透過兌換可換股票，又或者真金白銀落場，增持銀建權益。前者Catic兌換銀建正股價係2.2元，後者銀建控股增持成本價2.375元，銀建現價不過2.075元，現價買銀建，平過大股東增持成本。
再講，銀建大股東Catic隸屬國務院，第二大股東又係美國花旗集團，全部架勢堂，大股東出手增持，亦顯出對銀建信心。又銀建作為金融類股份，現價相對NAV2.27元，仲有輕微折讓。呢期博銀建彈番上橫行區2.65元，現價潛在升幅27%，到其時，P/B不過1.16倍，中資金融類別當中，都算係平，但計計潛在升幅，已經有魚有肉。
力華聞到有味
港股星期五回穩，力寶華潤（156）當日就成交近2268萬股，係過去一個月之冠，又係聞到有味，要昅昅。力華現價（0.193元）相對NAV0.54元折讓64%，已經夠吸引。
再講，力華現金連高流動性資產淨額高達12億銀，手頭又持有多項中、港優質投資物業，資產組合實淨到痹，NAV係冇水份。呢轉就算話博力華重返1年高位0.248元（潛在升幅28%），到時NAV折讓仲有54%，目標定價一啲唔過份。
錢雋