有潛質嘅靚馬要跑得快，一定要有叻騎師。中外運（598）最近換咗掌舵人，亦即換咗騎師，就快脫胎換骨。
港股上周見底回升，新一輪尋寶遊戲開始。上周五招商局（144）大升8%，與招商局啱啱黐上關係嘅中外運雖然亦升4.7%，全周仍跌4.3%，同歷史高位比較更跌4成半，非常落後，買得過。
國內海運界猛人趙滬湘（51歲），21年前加入招商局，現在做到副主席。招商局呢幾年成績同股價，有目共睹。去年底，趙滬湘獲委出任中外運母公司中國對外貿易集團總經理，今年3月接掌中外運，做中外運主席。
60億等住做嘢
趙滬湘受命掌舵中外運，估計最大任務係善用中外運手上高達60億元（人民幣．下同）嘅現金。中外運今番正係靚馬遇上叻騎師。另方面，中外運根據專家顧問提交嘅「戰略諮詢方案」，進入深入探討，未來發展新方向預期本月底落實。
中外運連同內資股在內，市值95.60億港元（單計H股只係40.21億港元），手上60億元相對於市值，比例好大，折合每股現金值1.41元。03年初上市至今，筆錢未有好好運用，每年只收取周息1.2厘嘅利息，嘥料到極。呢點就係股價成日落後嘅原因。筆錢如果用於收購資產，以PE10倍計，每年起碼可以多賺5億元，相等於去年中外運純利8.60億元嘅6成。
趙滬湘最近成日露面，又透露正計劃動用20億元發展珠三角港口碼頭業務，睇嚟已不及待，開始有動作，股份評價要提高。武捷思加入合生（754），張化橋加入深圳控股（604），兩隻股票即刻變咗大飛，記唔記得呢兩個古仔？
中外運若能善用手上現金，未來3年每年業績不難獲得3成以上複式增長。06年度（12月年結），預測盈利9.9億元，增21%，每股0.233港元，PE9.7倍，比拼日本39倍、德國33.9倍、美國20.1倍，平到痹。（美國Expeditors44.3倍，CHRobinson32.4倍，Fedex18.5倍。）
P/B方面，外國物流股郁吓都3倍以上，中外運得1.35倍，又係平到痹。
翻半番 翻1番
中外運上市以來，一直受到基金重視。國際速遞企業UPSAirCouriers持6.97%，掌管1500億美元資產嘅美國超級基金Oppenheimer持6.25%，Invesco持5.14%。
德意志原本持有9.50%，上月19日減持至5.37%。減持嘅73.8球（每股作價2.683元，涉資1.98億港元），即4.13%，可能由另1個友好新嘅基金接咗，但因少於5%，唔使披露。德意志上月19日至今，再唔見減持，早前減持應該唔係代表睇淡，或至少喺低過2.683元以下唔願意再減持。上周四周五中外運共成交57.9球，係上周初平均嘅8.3倍，事不尋常。上月接咗德意志批貨嘅買家，如果有加碼嘅話，身份好快見光。
中外運炒新舵手炒新路線，炒落後。現價2.25元，只較03年2月沙士前招股價2.19元高出6仙。有實力嘅國企，冇邊隻咁落後。
由2月高位3.70元跌落嚟，反彈累積跌幅1半，見2.90-3元。大市若趨平穩，則坐3望4，有機會翻半番翻1番。短炒，人民幣近期升到飛起，中外運揸住60億元人民幣，有賣點。
高彰坡