退休後的伍晃榮對每日的新聞報道依然非常留意，聽得出他對舊日的工作崗位仍戀戀不捨。「多數都會睇新聞，尤其是好留意人哋用乜嘢方式報道，我又未至於喺屋企扮報道新聞，你當我有問題咩！不過聽完人哋報道之後，我都會諗如果由我嚟報道嘅話會點，話晒我喺體育新聞報道方面都創造咗另一個方式，睇吓人哋又用乜嘢方式報道囉。」
緩和沉重氣氛
伍晃榮加入電視台前，曾經當過《英文虎報》的體育記者，又在商台擔任過港聞記者，問他最愛報道哪一類新聞？
伍晃榮以一貫報道新聞的口脗說：「正常新聞好多時都令觀眾睇完會覺得沉重，所以處理新聞嘅手法好多時會喺臨結束前擺啲較為輕鬆嘅item，好似係『大家睇吓隻白貓同隻黑貓玩到癲晒……』可能做慣咗啦，只要有段片，有張fax有少少料畀到我，我自然好快可以諗到點去豐富到個畫面。」