Twins最近出咗一隻叫做《八十塊環遊世界》嘅大碟，為咗配合宣傳，佢哋噚日就出席咗喺灣仔會展舉行嘅國際旅遊展，仲即場抽咗一張機票送畀現場觀眾。不過佢哋對張機票好依依不捨，事後同記者講笑話唔知贊助嘅航空公司會唔會送番一百幾十萬飛行哩數畀佢哋換機票或者升格機位上頭等，阿嬌（左）話：「計落真係未坐過頭等機位，咁貴唔捨得呀！我哋短途機都係坐經濟位咋。」