薛芷倫以前身為富商馬清偉太太時，曾被封為ball后，平日身光頸靚，着嘅係超級名牌，食嘅係鮑參翅肚，但離婚後，身家難免大縮水喇。早幾日關仁至喺灣仔撞見冇化妝又冇着靚衫、「原形畢露」嘅薛芷倫買翅，但佢買嘅並唔係天九翅，而係街邊碗仔翅。
上禮拜一下晝五點，素顏薛芷倫揸住黑波子喺灣仔活道出現，雖然佢戴cap帽遮面，但實在同佢嘅ball場閃令look差天共地，成個人好似甩晒色咁，所以幫襯街邊檔都唔怕被認出。
要新鮮出爐
當時薛芷倫叫咗碗碗仔翅同一餅雞蛋仔外賣，合共17蚊，女檔主就將已經整好嘅雞蛋仔放落紙袋，薛芷倫即時話：「我想要新鮮雞蛋仔。」對方當堂臉色一沉，用高八度聲線大叫：「呢個啱啱起㗎咋，阿姐！」但薛芷倫就細細聲再講：「我想要新鮮嘅。」女檔主瞄一瞄薛芷倫後，終於唔多願意咁話：「算喇，畀你喇！」之後女檔主整過塊新鮮雞蛋仔畀薛芷倫，薛芷倫畀錢離場時，女檔主忍唔住話：「真係麻鬼煩。」好彩佢走得快，乜都聽唔到咋，否則塊面肯定黑過鑊底。
