陳方安生是「香港良心」、鄧蓮如女男爵是活躍英國上流社會的優雅夫人，那麼鄧永鏘就可能是港英政府遺留下來的「風騷快活人」。在港、英上流社會均吃得開的他，可愛之處是夠真、夠直、夠敢言，從不反口覆舌口窒窒。正值父親節問鄧永鏘對子女的期望，他不會拋你一句行貨「無私的愛、不求回報」，反而抵死又真心說希望子女能娶或嫁個有錢人，他日可「DaHitLuDao（帶挈老竇）」。 撰文：林妙萍
名人版記者都愛見女模特兒、名媛或女星，皆因欠缺有趣答案都起碼有靚樣、靚衫、靚身材，三瓣總有一瓣中，圖片一定吸引。唯一例外的男子組，只得兩位，一個是風趣幽默兼長期多新聞的賭王何鴻燊，另一個就是今期父親節主角鄧永鏘（DavidTang）。
在活動上遇到DavidTang，某程度代表有料到、有料交，皆因他說話百無禁忌，又夠破格而且層次夠高，夠國際化，試問香港有哪個香港名人會與已故威爾斯王妃戴安娜（Diana,ThePrincessofWales）情非泛泛？03年再婚時，英國約克公爵夫人莎拉（SarahFerguson）及超模姬蒂摩絲（KateMoss）都是他的婚禮座上客？
為民主上街
鄧永鏘見到記者多（個人感覺是女記者）會特別口沒遮攔，講男女經講到天花龍鳳，絕對滿足到記者採訪時的快感，絕對是個高分數的被訪者。看似冇句真的他，到7．1大遊行，達官貴人個個冇影時，又會見他一身招牌白色唐裝衫，帶同子女，為了民主信念上街。
今天正值父親節，先跟鄧永鏘談做人父親，David與前妻張淑儀育有一子一女，做人老竇十多年，他自問給予子女百分之一百的愛，但相見時間太少，自評僅僅合格，他說：「100分滿分嚟講，我愛佢哋嘅程度值100分，關心、照顧佢哋方面值70分，見面時間計，就得50分。（100%forlove,70%forattention,50%seeingthem。）不過我每日都會同佢哋傾偈。」
鄧永鏘為子女教育、栽培品味、交織人脈網上都做得有聲有色，當中哪項最重要？他說：「最重要係忠誠，因為呢個係一個好難做得到嘅美德！」鄧永鏘是已故慈善家鄧肇堅的長孫，可以講得上是地道blueblood（貴族血統），問他對子女有何期望？他初時笑說：「最好兩個都嫁個或者娶個有錢人啦，DaHitLuDao（帶挈老竇）嘛！」
之後鄧永鏘認真地說：「我希望佢哋係一個快樂嘅人，快樂比有成就更加、更加重要！」藉着父親節，他向女兒鄧愛嘉寄語：「盡你所能，揀一個100%只為愛而嫁，或者100%只為錢而嫁嘅人，或者200%為錢與愛加埋嘅！」
與子女論政
David的兒子鄧裕鏗（Edward）14歲時，因為在一堆藝術品中，一眼看出當中一幅最貴的名畫，曾被傳媒封為「神童」。鄧永鏘對此說：「我唔覺得佢係一個神童或者天才，不過佢係quitegood啦！」Edward現時在英國設計師搖籃的名校CentralSt.MartinsCollegeofArt&Design，主修美術史，早前與超模姬蒂摩絲夜蒲，即時引來英國傳媒大肆報道，鄧永鏘對兒子在英國的生活、未來，給予極大自由度，他說：「佢唔需要接我棒入乜嘢英國上流社會，更加唔需要我，佢只要照顧好自己，做番自己就夠！」對於之前指兒子與姬蒂摩絲正好「以毒攻毒」，鄧永鏘說：「講笑啫，Kate係我哋成家人嘅goodfriend！我當佢係世姪女。」
愛念英詩，卻多數一身唐裝的David，是個極度有趣的「中英混血兒」，他曾經講過自己愛中國，但不喜歡共產黨，政治立場上，他會與子女討論，又要求他們忠於自己，爭取自己認為正確的事，正如他7．1帶同子女上街，他說：「我會鼓勵佢哋想爭取就爭取，有啲人係想爭取都冇辦法爭取。」
作曲寫小說
看似遊戲人間的David，做過飲食、時裝、私人會所生意，問他年過半百，未來還有甚麼想做？他說：「嘩！年過半百呢句真係hurt！我仲有好多嘢未做，想寫書，寫浪漫小說，同埋作吓音樂，都係浪漫嗰類型，有啲中國音樂影子嗰種呢，同埋未來十年八年，再創辦多啲嘢，之後70歲就退休喇。不過，我哋做開嘢，退休都係得個講字。」
有沒有想過從政或做外交官？David說：「從未諗過，太多嘢諗、太多嘢做，我未來呢十年都應該係繼續做生意，唔會做外交官喇，外交官講嘅嘢都冇句真話。」David認為由他開創的「上海灘」盛世，是他半生中最大的成功，他說：「見到中國會創辦咗12年，做得幾好，係生意上最大嘅滿足感，最唔滿足嘅可能係生意上賺嘅錢唔夠用。」
部份圖片提供：鄧永鏘
