最近美國皮膚學會月刊報道，原來鐵質同脫髮問題息息相關，多補充鐵質，頭髮分分鐘重生……講咁多，無非想提提你今日係父親節，老竇咁多年捱生捱死為頭家，各位亦好應該為老竇頭頂幾撮毛毛略盡綿力──整番幾味補髮菜幫老竇補一補，做一次負責任嘅仔女！
記者：陳慧茵
攝影：伍慶泉
Model：PC@Salvador
示範：符豪翼@紅軒
電話：22866868
地址：赤鱲角香港國際機場暢達路9號富豪機場酒店1樓
A.豬肝蠔仔湯生粉去潺
聞煮價：$20 1人
需時：10分鐘
所有都係重鐵質嘅滋補材料，由於係滾湯唔係煲湯，所需時間極少，唯一係小心認真揀走蠔殼，否則老竇咬落沙沙聲，唔好彩嘅分分鐘假牙都咬崩！
材料
蠔仔、瘦肉、番薯葉、豬肝各1両
簡易法
貼士
想洗走蠔仔表面嘅「滑潺潺」，只要加幾茶匙生粉入去撈一撈就得喇！
有營元素
蠔仔：含豐富鐵質、礦物質，可補充體力。
豬肝：含極豐富鐵質，多吃有補血功效。
B.雞茸焗全麥多士睇波送酒最啱
聞煮價：$10 3人
需時：10分鐘
非常易煮，只要幾塊方包、幾両肉、1個焗爐加少少愛心就得，全麥包夠營養，一口一啖，香脆煙韌程度十足零食，用嚟睇波送酒，唔使餐餐剝花生咁dry啦！
材料
雞髀肉4両、蝦膠1両、糖及鹽少許、生粉1茶匙、全麥方包2塊
簡易法
1.雞髀肉切碎後打成茸，混入蝦膠，以鹽及糖略調味，滾上少量生粉；
2.麥包1開6切成小方塊，將雞茸鋪放麥包上，烘焗4分鐘，取出塗上蛋黃漿再放焗爐焗1分鐘即成。
貼士
麥包底薄易烘燶，焗爐底火調校至50℃最啱，相對雞肉難熟，所以上火溫度要調至80℃。
有營元素
雞髀肉：縱使又發現禽流感，但可以揀急凍貨，雞肉含豐富鐵質，較植物的鐵質易被人體吸收。
C.蒜茸菠菜牛肉卷一啖一卷
聞煮價：$20 2人
需時：15分鐘
男人都係鍾意食肉，一啖一件嘅菠菜牛肉卷，夠晒方便！
材料
菠菜葉3塊、蒜茸少許、肥牛肉片8片、生粉1/2茶匙、清雞湯半杯、蠔油1/2茶匙、鹽、糖少許
簡易法
1.先將菠菜嘅菜葉切碎，加入蒜茸、鹽及糖炒熟；
2.再用肥牛肉片捲住，撲上生粉，煎熟上碟；
3.將上湯、蒜茸、蠔油、鹽和糖煮滾成芡汁，淋在牛肉面即可。
貼士
除咗菠菜葉，都可以用其他葉大嘅深色蔬菜代替，煮嘅時間要短，一軟身就要撈起，避免過黃。
有營元素
牛肉：鐵質比雞同魚豐富得多。
D.脆皮啤梨豆腐卷鹹甜酸都有
聞煮價：$20 3人
需時：10分鐘
平時食開嘅越南春卷通常蒸煮冷食，估唔到油炸後的春卷皮煙韌脆口，春卷入口鹹、甜、酸味共冶一爐，唔怪雞之餘仲幾新奇好味，掂！
材料
豆腐1件、啤梨1個、糖及鹽適量、越南春卷皮6塊、提子乾適量
簡易法
1.豆腐及啤梨切粒，加入糖及鹽調味；
2.春卷皮沾水，放入適量豆腐、啤梨及提子乾後捲起；
3.放入滾油內以中火炸至金黃色即可。
貼士
買返嚟嘅越南春卷皮好脆身，濕少少水就會迅速變軟，包時要快手。
有營元素
豆腐：黃豆含豐富鐵質，仲有蛋白質、胡蘿蔔素、異黃酮等。
提子乾：每100克提子乾含3毫克鐵質。
阿爸唔恨食 其實甜在心
ModelPC係孝順仔，但由於媽媽、婆婆、姐姐以至哥哥都係烹飪高手，所以佢一直無用武之地，最多只偶爾會煮幾味自創菜式來自娛一番，問到阿爸父親節想阿仔煮定係出街食時，施爸爸話都係出街食「穩陣」啲，又講：「佢手勢仲未得，我就唔恨食喇，哈哈哈！」雖然如此，但從他仍記得PC煮過XO醬煎雞翼、黑椒粟米雞扒等，把口話唔恨食，其實不知幾冧啦！
