一向口多多的林敏驄，與資深體育新聞報道員伍晃榮日前在無綫世界盃節目中嘲笑著名物理學家霍金（StephenHawking），被網友狂轟，兩人昨日凌晨先後在節目中公開道歉。而被傳與林敏驄有積怨的李克勤就刻意迴避與林敏驄合照，令不和傳聞愈炒愈熱。
林敏驄日前在無綫《頂Cup世界盃晚晚有德Fun》節目中指非洲科特迪瓦球隊隊員似野獸，又拿肌肉萎縮的世界級物理學家霍金來開玩笑，取笑伍晃榮似霍金，伍晃榮更即場歪嘴扮霍金，此舉不但被網友抨擊，影視處也接獲兩宗投訴，認為主持有不尊重傷殘人士之嫌。
伍晃榮打頭陣致歉
伍晃榮昨日凌晨率先在節目中「伍晃榮日誌」環節公開道歉：「本人衷心佩服嘅偉人，絕對唔係擁有千百億財富嘅商人，而係智慧超群嘅學者，好似霍金教授咁樣，假如本人無心之失，有令觀眾以為有對霍金教授有不敬行動，本人衷心致歉。」
伍晃榮道歉完畢，林敏驄也一本正經地說：「我聽咗伍晃榮嘅肺腑之言，我都有啲心底話要講，首先我係好多謝無綫畀機會我參與今屆世界盃，而且係阿叔（林尚義）最後一屆講波，我覺得係一個非常珍貴嘅經歷，每一位主持人我覺得都係專業同埋有經驗，佢哋每一個舉動都係想節目更加好，而我本人嚟講如果我講過嘅嘢，曾經令聽到嘅朋友唔舒服，我想喺度衷心同每一位朋友講唔好意思。」林敏驄道歉期間，克勤一度蹺手陰陰笑，林尚義則擺出一副「闊佬懶理」模樣，低頭不語。
影完合照黑面離開
近日有傳林敏驄和克勤早於四年前的世界盃舉行期間已有積怨，又有雜誌指克勤扮大佬辣㷫林尚義，是非不斷。昨日記者力邀克勤與林敏驄合照，只見克勤一度扮聽不到，後經記者再三要求，克勤便叫齊所有嘉賓主持一起合照，站在克勤身後的林敏驄則一臉得戚擺出V字勝利手勢。合照後克勤即面黑黑離開，似是想避開林敏驄。
克勤受訪時否認扮大佬辣㷫阿叔，但一提到林敏驄，他即耍手擰頭說：「我唔想講其他人任何事，唔止阿驄，就算其他嘉賓都唔係我哋控制。香港有言論自由，有冇過火留畀觀眾評論，作為主持係令節目好睇，遇到嘉賓唔知係咪踩界，咪補句『私人立場唔代表公司立場』囉。」問到早年積怨傳聞，克勤否認說：「冇呀，唔覺有問題。」至於林敏驄被問到是否與克勤不和時就表示不欲多言，以免愈描愈黑。
採訪：楊潔雯 攝影：葉君海
