去唱片舖行個圈，蔡琴的錄音例必堆積如山，因為十個音響發燒友有九個半用琴姐的碟來試音，近年我聽了不同公司出品的蔡琴專輯無數張，但講到靚聲？卻又無張令我落到筆，直至當收到這張《蔡琴經典【壹】》並細聽一遍之後，我有一種「終於等到了」的感覺。
高貴的紙質包裝，令自己忍不住摸了兩下，碟內的19支歌仔一如碟名真係首首經典，包括蔡琴廿多年前的成名作《恰似你的溫柔》、《你的眼神》及《不了情》等，當然點少得《無間道》中出現的《被遺忘的時光》呢！本碟的製作人更將母帶交到發燒友熟悉的德國「老虎魚」製作公司重新處理並壓印成24K金CD，一堆從前好聽但唔靚聲的歌仔猶如脫胎換骨、靚聲到痹，背景的雜聲、噪音一一掃清，令蔡琴磁性的歌聲更顯細緻傳神。其他同類錄音可以放埋一邊了！
文：李廸偉（ http://hk.myblog.yahoo.com/reviewcd）