「父親」是男人最溫柔的名字，如何兇悍的男人對着自己的孩子，總會有他慈愛一面。普世的子女在今天齊慶祝父親節，陳奕迅卻因不在香港，無法與父親陳裘大共度，故他日前與爸爸重遊十幾年沒有去過的大浪灣，兩父子對着茫茫大海，談起不少童年往事。 撰文：陳月媚
陳奕迅（Eason）12歲被父親陳裘大安排到英國讀書，學習獨立生活，在英國初期，因為離鄉別井，沒有父母在身邊，使他更懷念以往在香港的歲月，印象最深是父親每朝大清早愛吵醒喜歡賴床的Eason兩兄弟，然後駕車載他們到大浪灣看海，兩個孩子由初時的厭惡，到後期愛上了大海，每朝自動起來等待父親帶他們去海灘，這段日子他們三父子都覺得很快樂。
在今日的父親節，陳奕迅因為要到印度工作，不能在港陪父慶祝，但離港前他卻抽空陪父親重遊舊地──大浪灣，父子二人走到海邊散步、閒聊，忽然下着微微雨，陳奕迅撐起雨傘，為父擋風雨，十分體貼，難怪陳父表示：「以前我要Eason一切聽我嘅，𠵱家我就聽佢講多啲，呢啲就叫老來從子。不過有樣嘢我就好怕佢，就係佢講嘢講成日都入唔到正題，成日兜圈，所以有時我都忍唔住會打斷佢：『Gettothepoint！』話得佢多，𠵱家個仔講嘢好快入到正題。」
重視溝通減少磨擦
陳父對兩個兒子一向管教很嚴，而且每事都要由他作主和安排，這個情況維持了很長時間，導致孩子有事不敢告知父親，只會跟母親傾訴，父子間變得愈來愈有隔膜。不過Eason心裏卻一直很愛惜老爹，好想爸爸能做到如朋友般耐心聆聽他的心靈，而非每事替他作主。Eason說：「最近有個朋友講咗件事畀我聽，話佢嘅幾歲大嘅外甥俾同學仔蝦，個朋友都未聽完，第一時間窒住個外甥話：『一早叫你唔好同佢玩。』個小朋友即刻收晒聲，唔再講落去，個大人見個細嘅反應，即刻再𠱁番佢，然後好有耐性聽佢講晒成個古仔。呢件事啟發到我明白仔女只係想啲父母聽佢哋講嘢，並唔係要啲大人幫佢哋解決事情，所以要同仔女溝通得好，一定要畀空間佢哋，𠵱家我同康堤（Eason女兒）傾偈都要好有耐性聽晒佢講乜，唔同以前爹哋同我相處嗰套，只有佢講冇我講，其實我真係好想話畀佢知：『爹哋，你可唔可以靜心聽我講晒落去？』我只係想佢聽我傾訴咋。」
當陳裘大知道兒子心聲後，他笑說：「養子方知父母恩，𠵱家Eason做咗爸爸，有好多嘢佢開始體會到，以前我乜都同佢揸晒主意，以為個仔唔懂事，為咗佢好，我乜都要佢聽我指引去做。又真係幾專制，不過當時個仔從來唔駁嘴，我仲以為自己好威，以為個仔好聽話，但原來佢個心係有第二個諗法。」
拒做則師堅決唱歌
當年陳裘大在房屋署任高職，一直渴望兒子可做則師，所以一早為他鋪排一切，他說：「當年我係處心積慮想個仔做則師，安排佢喺英國修讀建築，初時以為佢都好鍾意，一心諗住等佢讀完大學就返嚟做見習則師，但後來先知原來係我一廂情願，原來佢唔鍾意做則師，只喜歡唱歌，但當時我係好反對，覺得唱歌又點會有出色，為呢件事同佢爭拗得好厲害，但佢好堅持，唔肯聽我勸返英國繼續讀書，所以我都好無奈同激氣。直到佢開始攞到第一個音樂獎後，喺樂壇愈做愈有成績，我就冇再反對佢喺娛樂圈發展。」
其實陳裘大也是很喜歡唱歌，而且覺得自己歌藝不錯，但如果要同兒子的歌藝比較，他認為：「咁個仔歌藝就好過我，今日佢可以喺樂壇有咁嘅成就，我都好安慰，也證明個仔當年嘅堅持係啱嘅。」
陳奕迅的名字原來亦有段古，陳裘大說：「個大仔出世時，因為當時我好鍾意毛澤東同魯迅，所以為大仔取咗個名叫澤迅，到細仔出世時，又幫佢起咗名叫奕迅，等佢可以精神奕奕，做嘢好迅速。」
發洩情緒保持真我
陳裘大認為Eason這個兒子對父親已做足一百分，沒有太多東西可以挑剔，唯一美中不足是EQ不夠，情緒控制方面還有待改善，這樣才不會吃虧。在旁的Eason卻不表認同說：「好多成功嘅藝術家，做嘢都係好徹底，一定會有脾氣，可以講係接近癲嘅，我覺得係一種用嚟平衡情緒嘅方法。如果要做到好圓滑就會失真，認識我嘅朋友都知道我份人好直，唔鍾意虛假。」
聽到兒子如此堅持，陳裘大微笑說：「仔大仔世界啦，有啲嘢真係要佢自己有經歷，先會識得點去做，以前講親呢啲話題，佢都會同我講：『爹哋，你咪由我跌吓，如果唔係，我永遠唔識爬番起身㗎！』個仔識咁講，我諗佢做嘢會有分寸，所以近呢兩年我都唔會成日同佢講耶穌，免得佢覺得阿爸煩。」
其實Eason面對朋友和家人很少會情緒失控，但每次面對狗仔隊的追訪，他的血壓就上升，他解釋：「我好唔鍾意傳媒騷擾我屋企人，自己做緊呢行就話冇辦法，你哋影我冇所謂，但我嘅屋企人，我真係希望傳媒可以畀番啲私隱佢哋。好似上次我喺德國度蜜月，一落機就見到香港啲狗仔隊係咁影，老婆已經俾狗仔隊搞到精神緊張。我哋已經去到咁遠，重要追住嚟影，想有番啲私人空間都唔得，梗係火起。」
兩地相隔電話傳情
Eason離開英皇前，他在事業上的決策，陳父是參與了不少意見，直至他改投陳家瑛門下，父親才不管。陳裘大解釋：「個仔已經有經理人，我實在唔方便畀太多意見，而且佢喺呢行咁多年，已經有經驗點去處理自己嘅事業，我唔參與意見，同個仔就會少啲爭拗，咁兩父子嘅感情其實仲比以前好咗。」
對於今日的父親節，Eason因工作不能在港陪他慶祝，陳父毫不介意說：「咁多年嚟，我對呢啲節日唔係咁重視，只要兩個仔開開心心咁生活落去，做父親嘅就好安慰。其實我要求好簡單，我只係希望個仔每次去到外地做嘢，到埗後就打個電話畀我報平安就得，好似今次佢到咗印度都有打個電話畀我報平安，知佢冇事，我就好放心。」
後記：陳七組合
執筆期間，赫然發覺這個專訪原來由陳氏宗親會包辦，包括受訪的陳裘大陳奕迅父子、攝影師陳偉權、編輯陳始正、負責核版的陳主華、美術設計員陳博文，連筆者在內，七人皆姓陳，非常巧合。
