「人要面、樹要皮」，尤其世界盃，背負國家榮辱，十幾億對眼望住，打得差啲真係千夫所指。英格蘭首仗贏得肉酸，上仗雖然唔算特別大改善，都叫做贏番場2:0，巴西同法國首仗表現俾人批評到暈，點都想打番場好好睇睇，等批評者收口。
記得上個禮拜二法國同巴西一齊登場，讓半/一嘅法國，俾瑞士迫和0:0，之後尾場巴西臨場讓到球半，結果險勝克羅地亞1:0，連追兩口上盤嘅球迷，真係輸到「眼坦坦」。
澳洲大敗勢難免
今日場次調換，巴西先登場。巴西上仗就真係差到暈，朗拿度重俾人笑好似有「身紀」，細哨、阿祖都打唔出水準，全隊嚴格嚟講只得卡卡同艾馬遜叫做及格。背負5屆冠軍嘅大名，森巴兵今場一定要好好睇睇，打番場漂亮足球。講真澳洲上場反勝日本，只係贏體力，不過呢班「澳洲牛」硬朗作風冇咩改變，遇着巴西呢啲頂級技術球員，胡亂犯規只會換來罰球，巴西死球專家真係一籮籮，要贏2球以上點都無問題。
至於法國，教練杜明尼治第一仗擺個4-5-1陣式，結果攻力疲弱外，中場更「人塞人」嚴重拖慢比賽節奏，好彩瑞士把握力太差，法國叫做執番一分。今場杜明尼治講明打番4-4-2，有沙夏拍番亨利，前線牽制力好番好多，中場馬隆達亦會復出，不妨俾多次機會佢。
宜捧1.45倍單W
其實南韓上場贏得有運，靠對手打少一個先可以反勝，把握力弱問題仍未解決，形勢上南韓3分在手，今仗應以守為主，希望博1分，不過戰意唔夠鮮明，影響埋決心。不過小弟今仗都只會揀法國1.45倍單W，因為法國再有冇能力大炒都好有問題。
文：牽牛