楊思琦一向是孝順女，她日前與爸爸到尖沙嘴一間意大利餐廳吃飯預祝父親節，兩父女度過了一個輕鬆愉快的下午。
曾反對選港姐
問思琦打算今日怎樣慶祝？她說：「我問咗經理人可唔可以度幾個鐘頭假，我想一家人食餐飯，共敍天倫，等爹哋開心吓！爹哋好鍾意食嘢，所以同佢食好味嘅嘢好過送禮物畀佢！」
思琦趁着食物未上枱，乖巧地為爸爸揼骨，拍照前又為他整理領呔，非常體貼。當美食送來，思琦又餵爸爸喝湯，認真廿四孝。
不講不知，思琦的爸爸當年極不贊成女兒選港姐，他說：「我個女份人好單純，我好擔心佢入娛樂圈適應唔到。」幸好這些年來，思琦的表現令雙親滿意，問她自覺遺傳了爸爸甚麼優良因子？她說：「我遺傳咗爹哋嘅口才囉，佢口齒好伶俐㗎！」楊爸爸即謙虛地說：「其實阿女叻過我好多，佢份人性格好開朗，待人接物都好有禮貌。」
楊爸爸對思琦最大的期望可是她早日出嫁？楊爸爸未及回答，思琦已搶着說：「咪搞！我有排都未嫁住。」記者指思琦的答案未必與父親一致，她即說：「爹哋好尊重子女嘅決定。」楊爸爸附和說：「女大女世界啦，佢開心就得！」