雖然大家被世界盃迷到暈陀陀，今日話晒都係父親節，老父為頭家日捱夜捱，唔係諗住同佢迫完茶樓就返歸煲VCD嘛？不如一家人踩入元朗夜訪童話式浪漫滿屋，同Daddy撐吓枱腳，包佢心甜。食飯前就親親大自然，摘新鮮生果，仲可以騎馬仔、坐牛車，讓Daddy發洩吓做牛做馬嘅壓力﹗
記者：盧家蕙
攝影：楊錦文
Model：Ricky、Kenny、Bonnie、WingWing(FromSalvadors)
帳幕裏撐枱腳
很多人都好喜歡看阿Rain的《浪漫滿屋》，韓國間FullHouse，到𠵱家仲有人排隊參觀，可見《浪漫滿屋》魅力逼人。無時間去韓國，一樣可以浪漫一下！唔講唔知，原來元朗都有間開業不久的「浪漫滿屋」，擺明食住韓流強勢。連閘門都是童話式的大閘，藍白色教堂建築內是一間一站式籌辦婚禮服務的公司，包括影新婚相的Studio和餐廳的廚房，「教堂」外有一輛白馬馬車。
外面有四個充滿歐洲和中國色彩的帳幕，供應午餐、下午茶和晚餐，仲有迷你舞台，可以上台向Daddy表達吓心意。配合命名為「帝皇」或「帝后」Set Dinner，抑或「父親節半自助晚餐」，置身於童話王國中撐枱腳，好鬼SweetSweet。父親節的餐單中，最吸引是有機小米蒸三文魚蜜糖汁，其他大路美食有美景襯托，味道自然升級。還有藍白色教堂入夜後更浪漫。
芝士焗龍蝦
龍蝦予人矜貴之感，果然撐得大場面，蝦蝦霸霸。
有機小米蒸三文魚蜜糖汁
蒸煮有機小米mix充滿omega3嘅三文魚，好明顯係sell健康，點點的三文魚鮮味滲透香甜軟糯的飯粒，啱晒唔想啖啖肉的人。
浪漫滿屋（24718992）
地址：元朗青山公路潭尾段390
收費：父親節半自助晚餐$198/位（包括自選頭盤、自助餐湯、沙律和甜品。）
帝皇SetDinner$398/位
帝后SetDinner$298/位
（包括一杯紅酒或白酒、四道菜、甜品及咖啡。）
動物全接觸
夜晚全家人去浪漫滿屋，食浪漫晚餐前最好先在附近的大棠荔枝山莊親近大自然。大棠荔枝山莊本來是一片荒蕪的山谷，佔地數百萬平方呎。雖然Daddy才是主角，但始終都要遷就小朋友，細路仔都是喜歡親近動物，建議集中玩四大項目。
餵肥豬踩水車
全家總動員親手餵飼多隻山羊、大白兔及大肥豬，再觀賞4隻被封閉的駝鳥，睇得唔惹得，工作人員話好危險喎！身後仲有個腳踏水車及行運大風車，一家人落足力踩水車，再望吓身後旋轉大風車，一樂也。
坐牛車氹氹轉
由牛仔領大家圍繞池畔、園地漫走一圈，欣賞山莊如畫美景。元朗的牛牛訓練有素，4歲的牛仔已經力大無窮，拉起載住一家四口的牛車依然定過抬油。
餵萬條錦鯉
下了牛車，自由自在漫步綠蔭小徑，閒坐湖心亭畔，如果Daddy平時餵家裏幾條魚毛已經好興奮，買包$5魚糧畀佢餵過萬條錦鯉，賞玩蜂擁而上的滾滾游魚，感覺澎湃，一家人餵魚都可以玩到依嘩鬼叫㗎！
果園策騎
坐完牛車，騎馬仔活動正式展開，平時睇開賽馬和做牛做馬的Daddy，對馬兒情有獨鍾，拿拿臨揀啱馬戴好帽，便可享受策騎之樂，騎住馬仔於果園漫步十分過癮。
大棠荔枝山莊（24702201）
地址：元朗大棠山道11號
入場費：每位$20（大小同價）
開放時間：9am-6pm
騎馬仔（一圈）成人$30小童$20
牛牛車遊山莊（每圈）成人$20小童$10
餵魚（魚糧）大$10細$5
餵動物（草）大$10細$5