一套《達文西密碼》，引嚟宗教界瘋狂抨擊，大指劇情混淆事實同虛構，但無可否認，小說亦係憑呢點而成功！好多藝術界結晶都被作者丹布朗玩轉再玩轉，甚麼蒙娜麗莎係雌雄同體、最後晚餐見到耶穌老婆等，都令人捨不得停下追看。
香港教徒 親赴歐洲解碼
OK！你玩瞞騙式解碼，我就用真正歷史同古迹去一一拆穿你的西洋鏡！香港基督教屬下嘅影音使團，就拉大隊遠赴意、法、英等歐洲國家，拍攝一套名為《地球深度行II──破解達文西密碼之旅》嘅電視特輯，連吳宗文牧師同梁永善牧師一行8人，走訪佛羅倫斯、梵蒂岡、羅浮宮等多個地方，不但跟當地專家討論小說上嘅疑點，更連解碼學者、符號學專家、藝術史學家和教會史學家都有涉及，以理性角度解構達文西作品嘅真相。不論喜歡《達文西密碼》與否，呢套電視特輯當中講及嘅藝術同歷史，都肯定令你對歐洲古迹及藝術作品有更深入真確嘅認識。
美版1區 搶閘上畫
另外，《達文西密碼》仍在香港上畫，但美版1區已經等唔切地殺到！以咁嘅名氣度開賣$135，美版碟嚟講都算幾平吓！齋「雞腸」睇唔明？唔緊要！港版3區今個星期亦貼住推一隻《解開達文西密碼》，從西方人的眼中，解讀諸如耶穌、聖殿騎士團，以及一幅幅藝術名作背後的種種傳說，$53都叫幾抵畀吓。
記者：徐影龍
播放日期：6月18日起，逢周日晚上8時亞視本港台播放。（共11集）
攝製隊日記網站：www.media.org.hk/expedition2/