80年代，樂壇有玉女掌門人周慧敏；90年代，有玉女次世代楊采妮；今時今日，有變種玉女鄧麗欣（Stephy）。
周慧敏和楊采妮都斯文大方，對愛情專一，緋聞男友一堆的Stephy竟破格自認男仔頭兼謝絕斯文，但為保玉女飯碗卻講明冇膽認拍拖，難怪男fans被她一網成擒，花樣少男日日送花送情信，叠米商家則掃其CD助谷銷量獻殷勤。 撰文：朱倬誼
鄧麗欣打死不認兩件事。第一，拍拖；第二，做玉女。但訪問途中𠵱𠵱哦哦，不認玉女但卻高興被譽為玉女新一代，堅稱緋聞全屬流料但卻拒答有沒有拍過拖，女人口是心非，又一見證。
「有都答冇㗎啦」
方力申、古巨基、陳冠希、鄭中基和曾因匿藏女廁被判遊蕩罪成入獄的九巴後人雷德賢，都曾先後跟Stephy傳緋聞，上述五位男士，在Stephy口中都是流料，但換個角度，問她入行後有否拍過拖，提醒她作為人氣偶像別扯謊，說話應真心坦白，坐在經理人公司裏的Stephy當場滿面緋紅，只管尷尬笑：「好難答你喎……哈哈……呀……哈哈……想拍嘅，唔理係咪做呢行，一個人有感情㗎，唔理拍戲定唱歌，有一刻有諗過（拍拖），唔知係咪鍾意，合作嘅時候，難免會有啲唔知係咪真嘅想法，Alex（方力申）？我拍戲鍾意佢㗎，投入吖嘛，角色真係鍾意佢，可能自己真係分唔到，有一刻係會投入，拍完戲會抽離。」
Stephy對感情潑水能收，豈非本事？她即時笑住兜番：「倒咗少少啫，仲有成杯水喺度，我本身性格幾理性，控制到自己嘅。」
講拍拖講到離題又尷尬，Stephy承認是因為她不敢認拍拖：「我唔敢講，玩死自己咩？公開係會令大家舒服，講咗就係挖開晒畀人睇，自己已經好似玻璃，行到邊都俾人影，拍拖好私人，有都答冇㗎啦。」
「最怕框死形象」
不認拍拖與玉女形象有唇齒關係，Stephy一張嘴拒做玉女，實際上又似乎頗受落：「我死都唔認做玉女㗎，好驚人哋定咗位，我覺得玉女係長頭髮，着白色裙，好斯文，個樣好靚，講嘢唔可以大大聲，做玉女幾難，我本身性格唔係咁，都唔斯文，呢個年代嘅玉女要多變化，要有好多嘢畀人睇到，要變，觀眾要求愈嚟愈高，唔可以畀一個框框定死自己，又唔可以過火，唔可以無啦啦狂野之城，做玉女好多壓力。
「但開心嘅，人哋咁睇得起畀呢個名，我性格比較男仔啲，我驚夾硬要自己變成女仔咁斯文，咁會好限制自己，拍戲我唔介意做醜角，Paco（經理人黃柏高）曾經講過想我做新一代玉女接班人，但公司冇畀壓力，冇話唔畀我點點點，拍戲要限制，唔會刻意性感，啲fans唔鍾意我性感㗎，佢哋鍾情玉女，男fans唔鍾意我少布，唔係想見暴露嘅我。」
「Fans當我女友」
既然成為新一代變種玉女，Stephy也確實冧到大班男fans，她說：「有男fans會keep住寫信畀我，佢哋已經當咗我係女朋友，話知我𠵱家工作好辛苦，唔阻你喇，冇咁忙先拍拖啦，佢哋覺得有機會同我發展㗎，咁花都有收過，最近有次搞簽名會，有個人送咗紮花去會場，入面有封信話佢（指送花者）點解嚟唔到，仲叫我去邊間HMV睇銷量榜會有驚喜，之前我聽公司啲人講，話有個人喺HMV訂咗我幾百隻CD，原來就係呢個人，我諗佢想為我做啲嘢。
「佢係個生意人，應該有啲錢啩？佢想識我，又講點解欣賞我，佢真係睇晒我嘅所有專欄、留意我寫嘅歌，我覺得感動，但唔會主動聯絡，尷尬啫，佢最深刻一句話係——我係佢一個似曾相識嘅人，搵到以前嘅佢，我對佢有啲驚驚哋，真係有啲咁嘅人喎，但sofar都冇乜好瘋狂嘅fans。」
攝影：陳偉權
服裝提供：西武百貨
