平日都係阿仔PC自己去街市，今日就同阿爸一齊去藍田啓田（萬有）街市走一轉。雖然阿爸平日少買餸，但對點買靚材料原來都好在行，果然真人不露相！
蠔仔
特點：生蠔即海蠣，由於口感綿滑加上營養豐富，被譽為「海之奶」。細細隻嘅海蠣喺廈門叫「蠔仔」，係當地人常用嘅材料，潮州人最鍾意用蠔仔煮粥或煎蠔餅，香口又鮮美。
點揀：
1.夠飽滿
2.有黑邊
3.有腥鮮味，新鮮蠔仔先會有陣陣海水味，開殼太耐嘅蠔仔無呢種味。
營養：
含豐富鐵質、礦物質，可補充體力。
啤梨
點揀：
1.果皮青中帶白
2.形狀飽滿，半生熟最好
3.如烹調用則揀白色部份較多嘅生啤梨
營養：
含大量纖維、果膠及鉀，有助保持人體血糖平衡，預防結腸癌和有降低膽固醇的作用。
豬肝
點揀：
1.色澤紅潤，帶光澤
2.不太白或太瘀黑
3.聞一聞無異味
營養：
含極豐富鐵質，多吃有補血功效。
